भांगरभूंय | प्रतिनिधी
उपलब्ध निधी प्रमाण अर्जांक मेळटा मंजुरीः भलायकी मंत्री
पणजी : गोंयांतल्या चलयो आनी बायलां खातीर म्हत्वाची आशिल्ल्या लाडली लक्ष्मी आनी गृहआधार ह्या दोन येवजण्यांचे 32,413 अर्ज विवीध कारणांक लागून प्रलंबीत आसात, अशी म्हायती बायलां आनी बाल कल्याण मंत्री विश्वजीत राणे हांणी विधानसभेंत आमदार क्रूज सिल्वा हांणी विचारिल्ल्या लेखी प्रस्नाच्या जापेंत दिल्या.
ह्या दोनूय येवजण्यांची अंमलबजावणी बायलां आनी बाल कल्याण खात्या वरवीं जाता. सध्याचे स्थितींत खात्या कडेन लाडली लक्ष्मी येवजणेचे 21,091 आनी गृहआधाराचे 11,322 अर्ज प्रलंबीत आशिल्ल्याचे मंत्री राणे हांणी जापेंत नमूद केला,
लाडली लक्ष्मी येवजणेचे अर्ज प्रलंबीत आसपा फाटल्यान कितें कारणां आसात, असो प्रस्न आमदार विरेश बोरकार हांणी विचारिल्लो. ताचेर कांय अर्जदार येवजणे खातीर गरजेचीं सगलीं कागदपत्रां सादर करिनात. ताका लागून तांचे अर्ज पुराय कागदपत्रां मेळ मेरेन प्रलंबीत दवरतात. तशेंच येवजणे खाला खात्याक सरकारा कडल्यान निधी मेळटा, त्या निधींतल्यान जितल्या जाणांक येवजणे खाला अर्थीक मजत दिवपाक मेळटा, तितले अर्ज मंजूर करतात, अशेंय मंत्री राणे हांणी म्हणलें.
सध्या लाडली लक्ष्मी येवजणे खाला खात्या कडेन अर्ज प्रलंबीत आशिल्ल्या लग्न जावंक नाशिल्ल्या अर्जदारांचे अर्ज सक्षम अधिकाऱ्यान जारी केल्ले वैध नागरी लग्न नोंदणी प्रमाणपत्र सादर केले उपरांत आनी निधी उपलब्ध जाले उपरांत मंजूर करतले, अशी हमीय मंत्री राणे हांणी जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
