भांगरभूंय | प्रतिनिधी
पावसा दिसांनी आपले कुडीची काळजी घेवप, आपलो आहार, जेवणांत मात्सो बदल करप म्हत्वाचें.
निळ्या निळ्या मळबांत काळ्या निळ्या कुपांची दाटी, घडघड्याचो बुलंद आवाज करीत पावसाचें आगमन जालें. सगले कडेन थंड वाऱ्याचीं ल्हारां पातळिल्लीं आसात. मनीस, जनावरां, सुकणीं, बेबे, मोर खोशयेन सामके पिशे जाल्यात. वसंत ऋतुंत कुचकुचीत पानांनी फुलू आयिल्ल्यो वेली, झाडां, पेडां पावसाच्या थेंब्यांनी ओलिचिंब न्हावन गेल्यांत. वचत थंय हरयाळीचे पाचवेचार गालिचे नदरेक पडटात. धरतरे मातेचो तो पाचवो शालूच. तरेकवार बुटे आशिल्लो. तो न्हेसून ती शांत न्हिदल्या, अशा वातावरणांत पयल्याच पावसांत सगलें चैतन्यमय जालां. सगले रिमझीम पावसान ओलेचिंब जाल्यात., मोग- मोगिका तर विचारूच नाकात. एकमेकांच्या हातांत हात घालून बरसो रे मेघा बरसो रे…. गीत गुणगुणटात तीं.
पावस आपलीं तरेकवार रुपां दाखयता. शिरशिरपी पावस, घोंग्याचो पावस, उटंगाराचो पावस, पिरपिरपी पावस. दोन दीस रागार फुगार जावन लिपून बसपी पावस. पावसाची लहरीं रुपां, सुंदरकाय पावसाच्या तीन- साडेतीन म्हयन्यांच्या काळांत पळोवपाक मेळटात. तुडुंब भरिल्ल्यो बांयो,दर्याचीं खळखळपी ल्हारां, दोंगरा वयल्यान सकयल घालून घेवपी दुदाळ, फेसाळ घसघशे. सगलें पळोवप म्हणल्यार सर्गसुख. रानांत पिसारो फुलोवन नाचपी मोर, फक्त पावसाच्या दिसांनीच पळोवपाक मेळटात.
अशा ह्या पावसांत रिमझीम पावसान ओले चिंब न्हावपाक सगल्याक आवडटता. पावस, सृश्टी, मानवी मनात नवचैतन्याचे तुशार उधळटा. उदक सांठिल्ले पळोवन तातूंतल्यान मंद मंद पावलां घालचीं अशें सगल्यांक दिसता.
पावसा दिसांनी आपले कुडीची काळजी घेवप, आपलो आहार, जेवणांत मात्सो बदल करप म्हत्वाचें. घरांत शिजिल्लेंच जेवप, हुनहुनीत उदक पियेवप, उक्त्या वयले तेलकट, मसाल्याचें, तिखट खावप ना. वडा पाव, पानीपुरी, पिझ्झा, रस, आम्लेट उक्त्यार खावप ना. उक्त्यार दवरिल्लीं फळां खावप ना. पणसाचें साठ खावप ना…. हातूंतल्यान जंतुसंसर्ग जावं येता.
नोकरेक वतना तापयिल्ले उदक, नेपकीन आनी एक जोडी कपड्याची बरोबर घेवन वचप गरजेचें. कारण ओले कपडे घालून फॅनापोंदा, एसींत बसप घातक. सैमांत मेळटा तें आळूं, तेरें,लुतीची भाजी, कुड्डूक, म्हशींग, तायखिळो खावप भलायकेक सामकें बरें. थंडी जाल्यार गंजन, पुदिना, तुळशीचीं पानां खालून काडो करून घेवपूय बरें. पावस म्हणल्यार एके तरेची मौज, मजा. पावसांत मोगी जिवांची खरी मजा. भर पावसांत तीं भिगी भिगी रातों मे, मिठी मिठी बातों में, गुंग जातात. पावस तसो बरो, मात तब्येतीची काळजी घेवन कितें तें करात.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
