गोंयच्या पाठ्यपुस्तकांत गोंयकार साहित्यिकांकयोग्य सुवात दिवपाची विरोधी फुडाऱ्यांची मागणी

भांगरभूंय | प्रतिनिधी

पणजी : गोंयच्या पाठ्यपुस्तकांत गोंयकार साहित्यिकांक योग्य सुवात दिवपाची मागणी विरोधी पक्ष फुडारी युरी आलेमांव आनी कॉंग्रेसीचे आदले गोंय प्रदेशाध्यक्ष अमित पाटकार हांणी केली.
शिक्षणीक, संशोधन आनी प्रशिक्षण परिशदे कडल्यान (SCERT) विद्यार्थ्यां खातीर निर्धारीत केल्ल्या मराठी पाठ्यपुस्तकांत गोंयां भायल्या लेखकांचें वर्चस्व आशिल्ल्यान आनी खुबश्या गोंयकार मराठी साहित्यिकां कडेन आडनदर जाल्ल्याचे खबरेवेल्यान विरोधी पक्ष फुडारी युरी आलेमांव आनी अमित पाटकार हांणी चिंता उक्तायल्या. एससीईआरटीचो निशेध उक्तावन गोंयच्या लेखकांक संदी दिवपाची मागणी केल्या.

हे कृतीचो खर निशेध : युरी आलेमांव
गोंयकारांनी महाराष्ट्रांत विलीनीकरण जावचें न्हय म्हणून लढो दिलो. मात आयज भाजप सरकार महाराष्ट्रांतले विचार बळयां गोंयांचेर लागू करतात. ५ वी ते ९ वेच्या पाठ्यपुस्तकांत गोंयच्या लेखकांक सोडल्यार महाराष्ट्रांतल्या लेखकांच्या साहित्याचो आसपाव करपाचे कृतीचो खर निशेध करतां. सरकारान हीं पुस्तकां फाटीं घेवचीं अशें युरी आलेमांव हांणी म्हणलें.

एससीईआरटीन स्पश्टीकरण दिवचें : अमित
प्रसिद्ध जाल्ले बातमे प्रमाण, एससीईआरटी गोंयान निर्धारीत केल्ल्या मराठी पाठ्यपुस्तकांत गोंयां भायल्या लेखकांचें प्रमाण व्हडा प्रमाणांत आशिल्ल्या खुबश्या गोंयकार मराठी साहित्यिकां कडेन आडनदर केल्या. हे खबरीक लागून आमच्या शालेय अभ्यासक्रमाची रचणूक नेमकी कशे तरेन करतात, हे विशीं गंभीर प्रस्न निर्माण जातात. एससीईआरटीन दरेका गोंयकाराक हे विशीं स्पश्टीकरण दिवप गरजेचें आसा, अशें पाटकार हांणी म्हणलें.
हो मुद्दो कोंकणी आड मराठी असो ना, हेर राज्यांतल्या साहित्यिकांचें योगदान उणें लेखपाचोय हेत नाशिल्ल्याचें तांणी स्पश्ट केलें. गोंयांक कोकणी आनी मराठी ह्या दोनूय भाशांक समृद्ध साहित्यपरंपरेचें दायज फावो जालां. ह्या दोनूय भासांनी आपली संस्कृती, इतिहास आनी वळखीक समृद्ध केल्या आनी दोनूय भासांक समान आदर मेळपाकूच जाय. मात गोंयच्या साहित्यीकांक गोंयांत योग्य मान्यताय मेळटा काय? हो खरो प्रस्न आसा अशें तांणी म्हणलें. शिक्षण फकत भाशा शिकोवपा पुरती मर्यादीत नाशिल्ल्यान विद्यार्थ्यांक तांचे भुंयेचो इतिहास, संस्कृती आनी साहित्यीक दायज हांचीय वळख करून दिवचपी आसचें.
आमच्या भुरग्यांनी अश्या गोंयच्या साहित्यिकांचें साहित्य वाचत व्हड जावचें, जांणी आपल्या समाजाक दिका दिली आनी साहित्यविश्‍वांत मोलाचे योगदान दिलें. हें तत्व गोंयांत शिकोवपी दरेके भाशेक लागू जावपाक जाय. गोंयचो शिक्षणीक अभ्यासक्रम हो गोंयची वळख प्रतिबिंबीत करपी आसपाक जाय, अशें तांणी नमूद केलें.

अमित पाटकार हांणी एससीईआरटी गोंयांक बेगोबेग सकयल दिल्ल्यो गजाली जाहीर करपाची मागणी केल्या :

• लेखक आनी साहित्यकृतींची निवड करपाक खंयचे निकश वापरले?
• पाठ्यपुस्तकांची निर्मिती करपी तज्ज्ञ समितींतल्या वांगड्यांचीं नांवां खंयचीं?
• कितल्याशाच नामनेच्या गोंयच्या मराठी साहित्यीकांक काडपा फाटलीं कारणां कितें?
• फुडाराच्या आवृत्त्यांत गोंयच्या साहित्यिकांक न्याय आनी अर्थपूर्ण प्रतिनिधित्व मेळचे खातीर खंयचीं पावलां उबारतले?
• गोंयच्या भायल्या साहित्यिकांक काडपाची कोणूच मागणी करिनात. गोंयच्या स्वताचे शिक्षण वेवस्थेंत गोंयच्या साहित्यीकांक तांचें योग्य स्थान मिळचें, आमची फकत इतलीच अपेक्षा आसा अशें पाटकार हांणी म्हणलें.
  जर दिसाळ्यांनी नमूद केल्ले असमतोल आसल्यार गोंय सरकार आनी एससीईआरटीन पुराय पारदर्शकतेन हाचेर जाप दिवची आनी पाठ्यपुस्तकांचो आढावो घेवचो, असोय उलो पाटकार हांणी मारलो.