भांगरभूंय | प्रतिनिधी
धनगर समाजाच्या एसटी दर्जा विशीं फळदेसाय हांची प्रतिक्रीया
पणजीः एसटी दर्ज्या विशीं धनगर समाजाच्या फुडार्यांक घेवन मुख्यमंत्री ४ ते ५ फावटीं दिल्लीक गेल्ले. पूण हे विशीं म्हाका विस्वासांत घेवंक नाशिल्लो. भेट दितना ज्यो घडामोडी घडटात ते विशीं समाजाची समिती म्हायती तशेंच हो विशय मुखार व्हरपाक म्हाकाय विस्वासांत घेवचो म्हूण हांवें मुख्यमंत्र्याक सांगलां, अशें समाज कल्याण मंत्री सुभाष फळदेसाय हांणी सांगलें.
सद्या ओबीसींतल्यान भायर सरून एसटी दर्जो मेळोवपा खातीर फाटलीं २३ वर्सां जाले धनगर समाज यत्न करतात आनी ज्या वेळार गावडा, कुणबी आनी वेळीप हांकां एसटी दर्जो मेळ्ळो, तेन्ना सावन एसटी समाजा भितर आसपावन घेवपा खातीर तांणी लढो उबारला, अशें फळदेसाय हांणी सांगलें.
समाज कल्याण खातें म्हण फाटलीं साडेचार वर्सां हांव काम करतां आनी हे मजगतीं म्हाका संद मेळटा तेन्ना हांवें स्वता दिल्ली वचून फाटपुरवण केल्या. भारतीय रेजिस्टार जनरला कडल्यान आमकां फायल परत येताली तेन्ना कितें उणाव आसा तो भरून ती फायल धाडटाले. मात आतां वेचणुकेचो काळ आशिल्ल्यान हो विशय मुखार पावला, अशें फळदेसाय हांणी सांगलें.
धनगर समाजाचें जें शिश्टमंडळ मुख्यमंत्र्या वांगडा वेव्हार करून मुख्यमंत्रीच ते विशय हाताळटाले. म्हजे साडेचार वर्साचे कारकिर्दी भितर मुख्यमंत्री तांच्या फुडार्यांक घेवन दिल्ली गेल्ले. मात म्हाका विस्वासांत घेवंक नाशिल्ले. मात हें धरून बस नासतना म्हजे कडेन जेन्ना फायल आयल्या ती एक दोन दिसां भितर क्लिअर करून तांचो प्रस्ताव परत म्हजे वटेनच्यान धाडला, अशें फळदेसाय हांणी म्हणलें.
आमी सगळे वांगडा एके माचयेर रावपाक जाय. मुख्यमंत्री वा केद्रांत भेटी वेळार ज्यो घडामोडी जातात ताची म्हाका म्हायती दिवची, अशें हांवें समितीक सुचयलां. ह्या घडामोडीं विशीं धनगर समाजाच्यो समित्यो म्हज्या संपर्कांत नासल्यो. ह्या विशयाची फाटपुरवण करपा खातीर म्हाकांय विस्वासांत घेवचे अशें हांवें मुख्यमंत्र्यांक सांगलां अशें फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
