भांगरभूंय | प्रतिनिधी
चिंबल ग्रामस्थांचो आरोप : आमदार रूडॉल्फ फर्नांडीस हांकां चर्चेचें आव्हान
पणजी : मेगा तशेंच घरनिर्माण प्रकल्प हाडपा खातीर चिंबलाचो आसपाव शारी वाठारांत करपाचे सरकाराचे यत्न आसात. थळावे आमदार रूडॉल्फ फर्नांडीस हांणी ह्या विशयाचेर ग्रामस्थांकडेन चर्चा करपाची गरज आसा. तांणी चर्चा करपाक येवचें, अशें आव्हान चिंबल ग्रामस्थांनी दिलां. चिंबलाचो आस्पाव शारी वाठारातं करपाक चिंबल ग्रामस्थांनी विरोध केलो. हे विशींचें निवेदन ग्रामस्थांनी पंचायतीक सादर केलें. अॅड. गोविंद शिरोडकार आनी अजय खोलकार हांच्या फुडारपणाखाला ग्रामस्थांनी निवेदन सादर केलां.
राज्यांतल्या ५६ गांवांचो आसपाव शारी वाठारांत करपाचो प्रस्ताव आसा. हे विशींची अधिसुचोवणी २०२० वर्सा जारी केले उपरांत आतां पंचायत संचालनालयान परिपत्रक जारी केलां. हाका लागून सगळ्याक विरोध जावपाक लागला.
चिंबल गांवांत शेत जमीन आसा. आजूनूय लोक शेती करतात. म्हामार्ग आसलो आनी पणजे लागी आसलें म्हूण चिंबल शार जायना. खंयच्या निकशाचेर चिंबल गांवचो आसपाव शारी वाठारांत करतले, हें स्पश्ट करपाची मागणी अजय खोलकार हांणी केली. ह्या विशयाचेर ग्रामसभेंत चर्चा जावपाक जाय. ग्रामसभेंत चर्चा वा ग्रामस्थांक विस्वासांत घेनासताना चिंबलाचो आस्पाव शारी वाठारांत करपाचो प्रस्ताव कसो आयलो? असो प्रस्न ग्रामस्थांनी केला.
गोंयची वळख नश्ट करपाचे यत्न : कॉंग्रेस
राज्यांतल्या ५६ गांवांचो शारी वाठारांत आसपाव करप म्हळ्यार गोंयचें दायज तशेंच वळख नश्ट करपाचो प्रकार आसा, असो आरोप कॉंग्रेसीचे म्हणयारे एड. अमीत पालेकार हांणी केला. गांवांचो आसपाव शारी वाठारांत करपाक कॉंग्रेसीचो खर विरोध आसा, अशें एड. पालेकार हांणी पत्रकार परिशदेंत स्पश्ट केलें.
आमदार क्रुज सिल्वा हांचो विरोध
चिंचिणी आनी सां झुझे दी आरीयल (नेसाय) ह्या गांवाचो शारी वाठारांत आसपाव करपाक वेळ्ळीचे आमदार क्रुज सिल्वा हांणी विरोध केलो. हो प्रस्ताव फांटी घेवपाची मागणी तांणी मुख्यमंत्री डॉ. प्रमोद सावंत हांकां पत्र बरोवन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
