भांगरभूंय | प्रतिनिधी
पणजी: कला आनी संस्कृत खात्या वतीन दिवपी प्रतिश्ठेच्या ‘कला गौरव पुरस्कार’ आनी ‘कला वृद्धी’ पुरस्कार जैतिवंतांचीं घोशणा केल्या. अंदूं ‘कला गौरव’न २० कलाकार जाल्यार ‘कला वृद्धी’न १० कलाकारांचो भोवमान करतले.
‘कला गौरव’ जैतिवंतांक शाल, श्रीफळ, स्मृतिचीन्नां, प्रशंसापत्र आनी दरेकी २५ हजार दिवन भोवमानीत करतले.
अंदूं नाट्य क्षेत्रा खातीर अनिल फळदेसाय (काणकोण), डॉ. व्यंकटेश हेगडे (सासश्टी), नारायण गोवेकार (दिवचल), प्रेमनाथ धारगळकार (पेडणें) आनी उमेश नायक (फोंडें) हांकां, साहित्य मळार कविता बोरकार (सासश्टी) आनी पुष्पा गायतोंडे (सासश्टी), तियात्रांत जोस परेरा (सासश्टी), लुईसिन्हा तोमासिन्हा जसिता फर्नांडीस ऊर्फ लुईझा फर्नांडीस (केपें) आनी लोरेन्स ग्रासिएस (सासश्टी), भजन मळार सहदेव लक्ष्मण परब (पेडणें), व्यंकटेश सिमेपुरुषकार (बार्देस) आनी किर्तीमालिनी च्यारी (दिवचल), संगीत मळार हेमंत नायक (सासश्टी) आनी दयानंद मांद्रेंकार (तिसवाडी), लोककला खातीर प्रमिला पणजीकार (बार्देस) आनी सातू माजीक (सत्तरी), हस्तकला मळार प्रेमानंद च्यारी (काणकोण) आनी शंकला च्यारी (तिसवाडी) हांकां, जाल्यार नाच मळार शोभा धामस्कार (सासश्टी) हांकां कला गौरव पुरस्कार फावो जाला.
‘कला वृद्धी’चे धा मानकरी
अंदूं साहित्य मळार भूषण भावे (फोंडें), तियात्र मळार ऑगी डिमेलो (बार्देस), भजन मळार स्मिता मांद्रेंकार (दिवचल), संगीताच्या मळार पुर्णानंद च्यारी (सासश्टी), लोककला मळार दत्ताराम सावंत (दिवचल), हस्तकला मळार सोनाली शेटगांवकार (पेडणें), चित्रकला मळार राजमोहन शेटये (पेडणें) शिल्पकला मळार नवसो परवार (सत्तरी), तशेंच नाट्य मळार एकनाथ नायक (फोंडें) आनी उमेश बांदोडकार (सासश्टी) हांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
