भांगरभूंय | प्रतिनिधी
म्हापशें: दत्तवाडी म्हापशेंच्या सेंट ब्रिटो विद्यालयाची फातरांची राखणे वणत रस्त्याचेर कोसळ्ळी. वण्टी वांगडा माडून मोडिल्ल्यान वीज सरयो तुटल्यो आनी वीज पुरवण बंद जाली. पोरूं पावसाळ्यांत हीच वणत एके मोटारीचेर कोसळून वीज खात्याची महिला कर्मचारी जखमी जाल्ली.
ही घडणूक बिरेस्तारा सांजेच्या 4 वरांच्या सुमाराक घडली. सेंट ब्रिटो विद्यालयाच्या मैदानाची राखणे वणत सज्जन संकुल इमारतीच्या फाटले वटेन आशिल्ल्या रस्त्याचेर कोसळ्ळी. ताका लागून वण्टीचे फातर- माती रस्त्याचेर आयले आनी रस्तो येरादारी खातीर बंद जालो. सुदैवान त्या वेळार थंयच्यान कोणूच वचनाशिल्लो. ताका लागून दुर्घटणा टळ्ळी.
घडणुकेची म्हायती मेळटाच नगराध्यक्ष प्रिया मिशाळ, उपनगराध्यक्ष विराज फडके हांणी घडणुकेचे सुवातेचेर वचून पळोवणी केली. तशेंच उजो पालोवपी दळ, वीज खातें आनी मामलेदार कार्यालयाक घडणुकेची म्हायती दिली. राती उसरां मेरेन पडिल्लो माड आनी फातर माती काडून रस्तो मेकळो करपाचें काम उजो पालोवपी दळाचे जवान आनी पालिका कर्मचारी करताले.
ह्या विद्यालयाच्या वेवस्थापनान आमदार निधींतल्यान वणत बांदचे खातीर अर्ज केला. ते प्रमाण 22 लाखांची निविदाय काडल्या. हें काम ताकतिकेन सुरू करून फुडारांतली दुर्घटणा टाळचे खातीर विद्यालयाच्या वेवस्थापनाक नोटीस जारी करतले, अशें नगराध्यक्ष प्रिया मिशाळ हांणी सांगलें. उपनगराध्यक्ष विराज फडके हांणी सांगलें, म्हापश्यां खूब पावस पडटा. ताका लागून पालसणां कोसळटात. लोकांनी आपल्या घराच्या भोंवतणच्या झाडांचे घातक खांदे वा गरज लागली जाल्यार पुराय झाड मारून घेवचें आनी फुडारांतली दुर्घटणां टाळची.
नोटीस जारी करून अजून कार्यवाही नाः नगराध्यक्ष
पोरूं राखणे वणत कोसळ्ळे उपरांत पालिकेन सेंट ब्रिटो विद्यालयाच्या वेवस्थापनाक नोटीस जारी करून ही घातक वणत दुरुस्त करपाची सुचोवणी केल्ली. पूण ताची कार्यवाही अजून जावंक ना. हे राखणे वण्टीचे कुशीक गटार वेवस्था ना. ताका लागून पावसाचें उदक मुरून वणत दुबळी जाल्या. तशेंच वण्टीक तेंकुनूच माड लायिल्ल्यान ही वणत कोसळ्ळी, अशें नगराध्यक्ष प्रिया मिशाळ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
