भांगरभूंय | प्रतिनिधी
शिक्षण संचालक शैलेश झिंगडे हांची म्हायती
पणजी : शालेय विद्यार्थ्यांच्या माध्यान्ह आहारा खातीर (मदले सुटयेतलें खाण) सरकारा कडल्यान बंगळुरूंतल्या ‘अक्षयपात्र’ आपसेवी संस्थेेची (एनजीओ) निवड केल्या. पूण हे संस्थे कडल्यान सेवा सुरू करपाक आनीक 6 म्हयन्यांचो वेळ लागतलो, अशी म्हायती शिक्षण संचालक शैलेश झिंगडे हांणी दिली.
माध्यान्ह आहार पुरवणे विशीं शिक्षण खात्यान जारी केल्ल्यो निविदा उक्तें जाले उपरांत हे खातीर ‘अक्षयपात्र’, ‘स्त्रीशक्ती’, ‘घनश्याम सेवा समिती’, ‘केंद्रीय भंडार मुंबय’ आनी नॅशनल फेडरेशन ऑफ फार्मर्स’ ह्या पांच आपसेवी संस्था (एनजीओ) पात्र थारिल्ल्यो. पूण खरी सर्त बंगळुरूंतल्या ‘अक्षयपात्र’ आनी दिल्लींतल्या ‘स्त्रीशक्ती’ हांचे मदीं आशिल्ली. ताका लागून निविदेक पात्र पांचूय संस्थांच्या कागदपत्रांचे छाननी उपरांत कंत्राटदारांचेर म्होर लावपाचो निर्णय शिक्षण खात्यान घेतिल्लो. ते प्रमाण कागदपत्रांचे छाननी उपरांत ‘अक्षयपात्र’ चें नांव निश्चीत जाल्ले. हे संस्थेन गोंयांत किचन तशेंच हेर कामा खातीर आनीक कांय म्हयन्यांची मुजत मागिल्ली. ताका लागून तांची माध्यान्ह आहार दिवपाची सेवा 6 म्हयन्या उपरांतूच सुरू जातली, अशें झिंगडे हांणी म्हणलें.
5 हजार विद्यार्थ्यांक दितले माध्यान्ह आहार
सुरवातीच्या टप्प्यांत ‘अक्षयपात्र’ 5 हजार विद्यार्थ्यांच्या आहाराचें कंत्राट दितले. उपरांत राज्यांतल्या सगल्याच विद्यार्थ्यांक हेच संस्थे वरवीं आहार दिवपाचो निर्णय सरकार घेवपाक शकता. केंद्रा कडल्यान तशी सुचोवणी अायिल्ल्यान आनी सरकारानूय विद्यार्थ्यांक दर्जेदार आहार दिवपाचे निश्चीत केल्ल्यान ‘अक्षयपात्र’ कडेनूच हें काम सोंपोवपाक शकता, अशी म्हायती शिक्षण खात्यांतल्या सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
