भांगरभूंय | प्रतिनिधी
फोंडें: माटोजे-शिगांवां काल (बिरेस्तारा) सांजवेळा गतीन वचपी नॅनो मोटारीचो धपको बसून पार्क केल्ले स्कुटरीचेर बशिल्ली आकांक्षा आनंद गांवकार (20, माटोजे) ही तरणाटी जखमी जाली. जाल्यार नॅनो चालक प्रमोद हरिश्चंद्र कुर्डीकार (42, कुडचडें) हो जखमी जालो. कुळें पुलिसांनी अपघाताचो पंचनामो केला.
कुळें पुलिसांनी दिल्ले म्हायती प्रमाण नॅनो मोटार सांवड्डें सावन शिगांवां वताली. माटोजे रस्त्याचे कुशीक दोन दुचाकी आनी एक शितपेयाची मारुती गाडी पार्क केल्ली. पार्क केल्ले एके दुचाकीचेर आकांक्षा आनंद गांवकार ही तरणाटी बशिल्ली तेन्ना फाटल्या येवपी नॅनो मोटारीन नेटाचो धपको दिवन तरणाटे सयत दोनूय दुचाकी पयस पडल्यो.
नॅनो मोटार तशीच मुखार वचून शितपेयाचे मोटारीक फाटल्यान नेटाचो धपको दिलो तेन्ना नॅनो रस्त्यार लवंडली. रस्त्यटाचे कुशीक आशिल्ल्या लोकांनी जखमी जाल्ले आकांक्षा आनी चालक प्रमोद हांकां 108 अॅम्बुलन्सीन उपचारा खातीर कुडचडेंच्या भलायकी केंद्रांत दाखल केले.
आकांक्षा हे तरणाटेच्या पांयाक गंभीर जखम जाल्ल्यान ताका मडगांवां सरकारी हॉस्पिटलांत धाडून दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
