भांगरभूंय | प्रतिनिधी
तीन गाडयांचें लुकसान : भुरगो वाटवलो, इमारत सील करपाचे निर्देश
मडगांव : मडगांव गांधीमार्केटा लागसारच्या आदल्या बँक ऑफ इंडियाचो फांटो आशिल्लो, ते पडपाचे अवस्थेंत आशिल्ले इमारतीचो कांय भाग पावसाक लागून कोसळ्ळो. हातूंत पार्क करून दवरिल्ल्या तीन गाडयांचें लुकसाण जालें. तांतले एके गाडयेंत बशिल्लो चलो वाटवलो. अतिरिक्त जिल्लोधिकारी, आमदार हांच्या पळोवणे उपरांत मोडपाक आयिल्लो भाग काडून ही इमारत सील करपाचे निर्देश दिल्यात.
मडगांवच्या आदल्या आनी मोडपाक पाविल्ले इमारतींचो मुद्दो फाटल्या कितल्याशाच वर्सां सावन मडगांवकारांचें दुखणें जावन पडलां. शुक्रारा दनपरां सुमार एक वरांचेर गांधी मार्केटा लागसारा आशिल्ले धोको निर्माण करपी इमारतीचो कांय भाग कोसळपाची घडणूक घडली. ही इमारत पोरणी आनी पडपाचे अवस्थेंत उबी आशिल्ल्यान पोरणी बँक ऑफ इंडियाचो फांटो हे इमारतींत आशिल्लो. ह्या इमारतीच्या बाल्कनीचो स्लॅबाचो भाग सध्या कोसळ्ळा. हे इमारती सकयल चार गाडयो पार्क करुन दवरिल्ल्यो. तांतल्या तीन गाडयांचेर स्लॅबाचे व्हड कुडके पडिल्ल्यान गाडयेचें लुकसाण जालां. आमदार कामत हांणी सांगलें, इमारतीचो धोको निर्माण करपी भाग गॅस कटरा वरवीं काडटले. इमारत सील करपाचे आदेश जिल्लोधिकारी काडटले. जांचें सामान भितर आसा तें काडपाची मेकळीक दिल्या. रस्तो येरादारी खातीर आनी पार्किंगा खातीर बंद करीत फकत चलत वचप्यां खातीर एके वटेन चालूच दवरतले. स्ट्रक्चरल ऑडीट करतले, अशें तांणी सांगलें.
आमदारां सयत अतिरिक्त जिल्लोधिकार्यां कडल्यान पळोवणी
घडणुकेची म्हायती मेळटांच मडगांवचे आमदार दिगंबर कामत हे घडणुके सुवातेर पावले. तांचे सयत नगराध्यक्ष दामोदर शिरोडकार, अतिरिक्त जिल्हाधिकारी श्रीनेत कोठवाळे, गणेश बर्वे, कार्यकारी अभियंता वेलिंगकार हजर आशिल्ले. ह्या वेळार इमारतीचो मोडपाक पाविल्लो भाग गॅस कटरा वरवीं काडपाच्यो सुचवण्यो उजो पालोवपी दळाक दिल्यो. तो मेरेन रस्तो येरादारी खातीर बंद दवरचो आनी इमारत सील करपाचे आदेश जिल्लोधिकार्यां कडल्यान दिल्यात.
गांडयेंतलो ल्हान भुरगो वाटवलो
गांधीमार्केटा लागसारचे धोको निर्माण करपी इमारती सकयल पार्क केल्ल्या तीन गाडयांचें लुकसाण जालें. हातुंतले पयले वॅगोनार गाडयेंत आठ वर्सां पिरायेचो ल्हान भुरगो बशिल्लो. ताची आई सत्री दुरुस्ती खातीर मार्केटांत गेल्ली आनी चलो मोबायल घेवन गाडयेंत बशिल्लो. ते गाडयेचेरूय पांख्याचो कुडको पडलो. गाडयेचें लुकसाण जालें, मात त्या भुरग्याक कांयच जावंक ना. तो वाटवलो.
दोन वर्सां आदीं कोसळिल्लो कांय भाग
हे धोको निर्माण करपी इमारतीच्या बाल्कनीच्या स्लॅबाचो कांय भाग दोन वर्सां पयलींच पडिल्लो आनी तेन्ना एके गाडयेचें लुकसाण जाल्लें. ताचे उपरांतूय कांय कुडके पडटाले, मात इमारतीच्या धनयान जतनाय घेवंक ना. शिवणकाम प्रशिक्षण वर्गा सयत आनीक एक दुकान हे इमारतीचे पयले माळयेर सुरू आशिल्लें. मात कोणाकूच दुखापत जावंक ना.
पालिका जापसालदार ना: कामत
ह्यो धोको निर्माण करपी इमारती खाजगी मालकीच्यो आसात. त्यो मडगांव पालिकेच्या ताब्यांत नात, ताका लागून ती सरळ पालिकेची जापसालदारकी न्हय. जिल्लोधिकार्यांनी आदेश दिले उपरांतूय मुख्याधिकार्यां कडल्यान ही खासगी इमारत मोडपाक शकना, हे खातीर प्रक्रिया आसता. पालिका धोको निर्माण करपी इमारतींक नोटीस दितात, धनी न्यायालयांत वचून ताचेर स्थगिती हाडटात. पालिका आनी आमदारांक खासगी इमारती मोडपाचो अधिकार ना. ताका लागून कायदेशीर प्रक्रिया करतले, अशेंय आमदार कामत हांणी सांगलें.
मिनेझिस इमारतीची माती ४८ वरांनी काडपाचो निर्देश
सुमार तीन वर्सां आनीं गांधी मार्केटा लागसारचो मिनेझिस इमारतीचो कांय भाग कोसळिल्लो. तेन्ना ती इमारत धोको निर्माण करपी आशिल्ल्यान जिल्लोधिकार्यांनी सील केल्ली आनी धनयाक ती मोडपाचे निर्देश दिल्ले. फाटल्या वर्सा इमारत उडयले उपरांत आजूनय माती, फातर थंयच आसात. ४८ वरांनी ती रांस काडपाची नोटीस काडची. तांणी काडूंक ना जाल्यार तें काम आरटसोर्स करुन ते सुवातेचो ताबो जिल्लोधिकारी कार्यालयान घेवचो, अश्यो सुचवण्यो आमदार दिगंबर कामत हांणी केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
