भांगरभूंय | प्रतिनिधी
भारत आनी पाकिस्तान ह्या पंगडां मदीं 10 सप्टेंबराक म्हणल्यार आयतारा आशिया करंड क्रिकेट सर्तींतली सुपर चारांतली मॅच जातली. हे मॅची खातीर आयोजकांनी राखीव दीस दवरला. हाचे पयलीं फकत फायनली खातीर राखीव दीस दवरिल्लो. पूण, आतां भारत आनी पाकिस्तान ह्या पंगडां मदीं जावपी सुपर चारांतले मॅची खातीर राखीव दीस दवरपाचो निर्णय आयोजकांनी घेतला.
राखीव दिसाच्या नेमा प्रमाण मॅच पयल्याच दिसा पुर्ण करपाचो यत्न आसतलो. पयल्या दिसा मॅचीच्यो ओव्हरी उण्यो करता, जाल्यार दुसऱ्या दिसा थंयच्यान मॅची परतून सुरू जातली. हाचो अर्थ पयल्या दिसा मॅच अर्दकुटी उरली जाल्यार दुसऱ्या दिसा परतून सुरवाती सावन सुरू जावची ना.
पावसाक लागून आशिया करंड सर्तींतल्या चडश्या मॅचींक आडखळ जाल्या. गट पांवड्याचेर भारत आनी पाकिस्तान ह्या पंगडां मदली मॅच पावसाक लागून पुर्ण जावंक नाशिल्ली. भारत आनी नेपाळ ह्या पंगडां मदीं जाल्ले मॅची वेळार लेगीत पावसान उपस्थिती लायिल्ली. ताका लागून ओव्हरी उण्यो करच्यो पडिल्ल्यो.
भारत आनी पाकिस्तान ह्या पंगडां मदली मॅच कोलंबोंत जावपाची आसा. पूण, हवामान खात्यान त्या दिसा पावसाची शक्यताय आसा अशें स्पश्ट केल्या उपरांत पाकिस्तान क्रिकेट मंडळान ही मॅच हंबनटोटांत आयोजीत करपाचो निर्णय घेतिल्लो. पूण, एसीसीन पाकिस्तान क्रिकेट मंडळाक ई-मेल करून पयलीं थारायिल्ले सुवातेर म्हणल्यार कोलंबो शारातूंच मॅच खेळोवपाक सांगलें.
पाकिस्तान क्रिकेट मडळान एसीसीचो आदेश मान्य केलो. पूण, ह्या निर्णयाचेर पीसीबी खोशी नाशिल्लें. ते खातीर पीसीबीन एसीसी अध्यक्ष जय शाहाक पत्र लेगीत बरयिल्लें. आयतारा कोलंबोंत पावस पडपाची 90 टक्के शक्यताय आसा.
मजगतीं, भारताचो फास्ट बॉलर जसप्रीत बुमरा पंगडांत परतून सामील जालो. वैयक्तीक कारणाक लागून तो मुंबय गेल्लो. ताका लागून नेपाळा आडची मॅच ताका चुकिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
