भांगरभूंय | प्रतिनिधी
हार्दिक पांड्यान आंतरराष्ट्रीय क्रिकेटींत आपले मुखेलपदाचे कारकिर्दीक जैतान सुरवात केली. भारतान आयर्लेण्डा आडचे पयले टी-20 मॅचींत 7 विकेटींनी जैत जोडलें. पांड्या बॅटींग आनी बॉलींग दोनूय विभागांनी बरें प्रदर्शन केलें. ताणें आयर्लेण्डाच्या डावांत एक विकेट घेतली जाल्यार उपरांत 11 बॉलांनी 24 धांवड्यो लेगीत केल्यो.
पावसाचे आडखळीक लागून मॅच दरेकी 12 ओव्हरींची केली. आयर्लेण्ड टॉस हारल्या उपरांत पयलीं बॅटींग करपा आयलो. ताणें 4 विकेटी वगडावन 108 धांवड्यो केल्यो. हॅरी टॅक्टरान सगल्यांत चड 64 धांवड्यो केल्यो. भारतान 9.2 ओव्हरींनी 3 विकेटी वगडावन मोख मेळयली. दीपक हुड्डान नाबाद 47 धांवड्यांची खेळी केली. दुसरो ओपनर ईशान किशनान 26 धांवड्यांचें योगदान दिलें.
हे मॅची वरवीं फास्ट बॉलर उमरान मलिकाचो देशा वतीन खेळपाचें सपन पुर्ण जालें. पूण, ही मॅच बरी थारूंक ना. भारता वतीन टी-20 क्रिकेट खेळपी 98वे खेळगडो थारिल्ल्या उमरानाक फक्त एक ओव्हर घालपाक मेळ्ळी. हे ओव्हरींत ताणें 14 धांवड्यो दिल्यो.
मजगतीं, आयर्लेण्डान दिल्ले मोखीचो फाटलाव करपी भारताची सुरवात बरी जाली. ईशान किशनान पयले ओव्हरींत 15 धांवड्यो केल्यो. किशनान पावर प्लेचो फायदो घेत आक्रमक बॅटींग केली. पूण, ताका क्रेग यंगान वैयक्तीक 26 धांवड्यांचेर बोल्ड करून भारताक पयलो धपको दिलो. ते उपरांत फुडल्याच बॉलाचेर क्रेगान सुर्यकुमार यादवाक बोल्ड केलो.
सुरवातीक सादूरतायेन बॅटींग करपी हुड्डान आपलें गियर बदल्लें. ताका साध दिवपाक आयिल्ल्या हार्दिक पांड्यान लेगीत आक्रमक बॅटींग केली.
ह्या दोगांयनी तिसरे विकेटी खातीर नाबाद अर्द शेंकड्याची भागिदारी केली. पूण, 32 बॉलांनी 64 धांवड्यांची ही भागिदारी जोशुआ लिटिलान फोडली. ताणें 12 बॉलांनी 24 धांवड्यांची खेळी करपी पांड्याक बाद केलो. ते उपरांत हुड्डान नाबाद 47 धांवड्यांची खेळी करीत जैताची औपचारीकताय 9.3 ओव्हरींनी पुर्ण केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
