भांगरभूंय | प्रतिनिधी
गृह मंत्रालयाचे राज्यांक म्हत्वाचे आदेश
नागरी सुरक्षा संचालकांक अधिकार दिवपाचे निर्देश
शिमेर आनी विमानतळांचेर सुरक्षा वाडोवपाचेर भर
खबरां संस्था
नवी दिल्ली : भारत – पाकिस्तान शिमेचेर तणाव वाडला. ताका लागून केंद्र सरकारान राज्यांक म्हत्वाचे आदेश दिल्यात. गृह मंत्रालयान राज्यांक नागरी सुरक्षा (सिव्हील डिफेन्स) उपाय लागू करपाक सांगलां. 1968 च्या कायद्या प्रमाण हे आदेश दिल्यात. भारत – पाकिस्तान शिमेर जाल्ल्या हल्ल्या उपरांत सुरक्षा वाडोवपाची गरज आसा. ताका लागून हें पावल उखल्लां.
सध्याचे स्थितींत, नागरी सुरक्षा नेम, 1968 च्या कलम 11 प्रमाण, राज्य सरकाराक लोकांचें आनी मालमत्तेचें सरंक्षण करपाचे अधिकार आसात. तशेंच म्हत्वाच्यो सेवा वेवस्थीत चालू दवरपाचे अधिकार आसात, अशें पत्रकांत म्हणलां. कलम 11 प्रमाण, तुमच्या राज्यांतल्या नागरी सुरक्षा संचालकांक गरजेचे अधिकार दियात. जाका लागून ते ताकतिकेन गरजेच्यो उपाय येवजण्यो करपाक शकतले, अशेंय पत्रकांत म्हणलां.
केंद्रीय गृह मंत्री अमीत शाह हांणी बीएसएफ, सीआयएसएफ, बीसीएएस, गृह सचीव आनी आयबीच्या संचालकां कडेन चर्चा केली. पाकिस्तान शिमेर आनी विमानतळांचेर सुरक्षा वाडोवपाचेर लक्ष केंद्रीत केलें.
बिरेस्तारा पाकिस्तानान जम्मू-काश्मीर आनी राजस्थानांत ड्रोन आनी क्षेपणास्त्रांनी हल्ले केले. भारताच्या सुरक्षा यंत्रणांनी भोवतेक हल्ले येसस्वी तरेन निश्क्रीय केले. हातूंत एस-400 सारक्या आधुनीक क्षेपणास्त्र प्रणालीचो वापर केलो. भारतान केल्ल्या ऑपरेशन सिंदूर खाला भारतीय सैन्यान पाकिस्तानांतले आतंकवादी तळ उध्वस्त केल्ले. पहलगाम हल्ल्यांत 26 लोकांक मरण आयिल्लें. ते उपरांत भारतान हें ऑपरेशन केलें. ह्या ऑपरेशनांत भारतान पाकिस्तानांतले 9 आतंकवादी तळ आनी कांय म्हत्वाचे तळ उध्वस्त केले. देशांतली सुरक्षा वेवस्था अदीक घटमूट करचे खातीर केंद्र सरकार गंभीर आसा. ताका लागून खंयच्याय संकश्टाक फुडो करपा खातीर देश तयार रावतलो.
नागरी सुरक्षा म्हणल्यार कितें ?
नागरी सुरक्षा म्हणल्यार झूज वा सैमीक आपत्तीच्या वेळार लोकांचें सरंक्षण करप. हातूंत सुरक्षीत सुवातेर वेवस्था करप, लोकांक मजत करप आनी गरजेची सेवा दिवप हांचो आस्पाव आसता.
1968 चो कायदो कितें?
हो कायदो नागरी संरक्षणा खातीर केला. ह्या कायद्या प्रमाण, केंद्र आनी राज्य सरकाराक नागरी संरक्षणा खातीर गरजेचे उपाय येवजण करपाचे अधिकार आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
