भांगरभूंय | प्रतिनिधी
-4 म्हयन्यांत बांदोडकार यादस्तीक करंड फुटबॉल सर्तीचेय आयोजन
पणजीः गोंयचे पयले मुख्यमंत्री भाऊसायब बांदोडकार हांच्या स्मृती थळाच्या नुतनीकरणाचें काम फुडल्या तीन ते चार म्हयन्यांत सुरू जावन वर्सभरांत पुराय करतले. भाऊसायब फुटबॉल मोगी आशिल्ले. ताका लागून तांच्या 50 व्या पुण्यतिथी निमतान फुडल्या तीन म्हयन्यांत गोंय फुटबॉल असोसिएशना वतीन भाऊसायब यादस्तीक करंड फुटबॉल सर्तीचे आयोजन करतले, अशी म्हायती मुख्यमंत्री डॉ. प्रमोद सावंत हांणी दिली.
भाऊसायबांच्या 50 व्या पुण्यतिथी निमतान मुख्यमंत्र्यांनी मिरामार हांगा स्मृतीथळार वचून तांकां अभिवादन केले. ह्या वेळार तांचे वांगडा वीज मंत्री तशेंच मगोचे फुडारी सुदिन ढवळीकार आनी भाऊसायबांचे कुटुंबीय हाजीर आशिल्ले.
गोंयचे पयले मुख्यमंत्री ह्या नात्यान भाऊसायबांनी गोंयच्या उदरगतीची बुन्याद घाली. तांणी आपल्या कार्यकाळांत केल्ल्या उदरगतीचो विकास फुडल्या वर्सभर विवीध कार्यांवळींच्या माध्यमांतल्यान लोकां मुखार मांडटले. भाऊसायबांनी शिक्षणाची गंगा राज्यांतल्या घरांघरांनी पावयली. सरकारी शाळा सुरू करून गोंयच्यो जायत्यो पिळग्यो तांणी घडयल्यो. ताका लागून अंदूं बाबत स्थितींत आशिल्ल्या सगल्याच सरकारी शाळांच्या नुतनीकरणाचें काम पुराय करतले, अशी हमी तांणी दिली.
मजगतीं, फोंड्यां कृशी मंत्री रवी नायक हांणी भाऊसायबांच्या पुतळ्याक फुलांहार घालून तांकां आर्गां ओंपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
