भांगरभूंय | प्रतिनिधी
भांगरभूंय । पत्रक
पणजीः पणजेच्या बालभवना वतीन गुरु पुनव व्हडा उमेदीन मनयली. बदलत्या युगांत गुरूःशिष्य परंपरेक सामकें म्हत्व आसा. ती राखून दवोरपाक जाय. ताका लागून गुरू विशींचो आदर वाडीक लागतलो अशें बालभवनाचो संचालक दयानंद चावडीकार हांणी सांगून गुरू पुनवेचें म्हत्व सांगलें.
येता त्या फुडाराक बालभवनांत भुरग्यां खातीर नवेतरेचो कार्यालाप सुरू करतले. ते खातीर पालकांचें सहकार्य अपेक्षीत आसा. शिक्षणा वांगडा बालभवनात दितात त्या संगीत. नाटक, नाच आनी हेर कला शिक्षणांचो लाब भुरग्यांचे जिणेंत जातलो अशें चावडीकार हांणी सांगलें. कार्यावळीक कार्यक्रम संयोजक शशिकांत पुनाजी आनी पालवी लेखाधिकारी लक्ष्मीदास मणेरकार हाजीर आशिल्ले.
गुरु पुनवे निमतान भुरग्यांनी सांस्कृतीक कार्यावळ सादर केली. गुरूने दिला ज्ञानरुपी वसा हे गुरु वंदनेत कार्यावळीक सुरवात जाली. ते उपरांत गुरूची महती सांगपी अभंग भुरग्यांनी सादर केलें.
तबलें वादन सहवादनांत भुरग्यांनी ताल त्रिताल जाल्यार हार्मोनियम वादनांत राम यमन सादर केलो. गिराट विभागांतल्या भुरग्यांनी पाश्चात्य संगीत सादर केलें. भरतनाट्यम विभागांतल्या भुरग्यांनी आकर्शक भेसांत भरतनाट्यम सादर केलें. ही कार्यावळ सादर करपा खातीर बालभवनाची वरिश्ट प्रशिक्षक मनिषा तारी, चैत्रा मांद्रेकार, जानव्ही कोटनीस, कविता गौडा, इव्हॉन वालादरीस, महेश गांवस, केतन च्याी, अनिकेत नांगरे हांणी भुरग्यांक मार्गदर्शन केलें. कार्यावळीचें सूत्रनिवदेन श्रीपाद दत्तराज देसायान केलें महेश गांवकरान उपकार मानले. दीपक बर्वेन आवाज संयोजन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
