भांगरभूंय | प्रतिनिधी
मडगांवः 1858 वर्सा पयलें शिक्षण विधेयक संमत जालें तरी भारतीय लोक गुलामगिरीतूच उरले. 1997 वर्सा स्वामी विवेकानंद हांणी विचारांत आनी मनांत गुलामगिरींतल्यान भायर सरप गरजेचें अशें सांगिल्लें. तेन्नाच तुमकां स्वातंत्र्य मेळूंक शकता. स्वामी विवेकानंद केन्नाच ब्रिटिशांआड उलयले नात. ताणें बौद्धीक नदरेन भारतीय मनांत विचार करपाची दिका बदल्ली अशें राज्यपाल पी. एस. श्रीधरन पिल्लई हांणी मडगांवां रवींद्र भवनाच्या मुखेल सभाघरांत उलयतना सांगलें.
प्रुडंट मिडियान तयार केल्ल्या ‘नमो सिद्धरुढाय’ ह्या डॉक्युमेंटरीच्या उक्तावण सुवाळ्यांत ते मुखेल सोयरे म्हणून उलयताले. तांच्या हस्तुकीं ह्या डॉक्युमेंटरीचो शुभारंभ जालो. ह्या संदर्भांत भारत सरकाराचे उर्जा आनी नवीकरणीय उर्जा मंत्री श्रीपाद नायक, समाज कल्याण मंत्री सुभाष फळदेसाय, धारवाडचे आमदार महेश तेंगीकाई, मुरगांवचे अामदार संकल्प आमोणकार आनी हेर मानादीक वांगडी हाजीर आशिल्ले.
भारतीय अध्यात्म फकत सनातन धर्मांतच न्हय, जाल्यार पुराय भारतांत आसा, हें सांगतना राज्यपालांनी जायतीं उदाहरणां दिलीं.
उर्जा आनी नवीकरणीय उर्जा, भारत सरकाराचे मंत्री श्रीपाद नायक हांणी ह्या निमतान आपल्या भाशणांत म्हणलें, हिंदू संस्कार, चालीरिती आनी परंपरा नश्ट करपाच्या हेतान धर्माचेर खूब हल्ले जाले. बांगलादेश आनी पाकिस्तानांत भारतीयांचेर जाल्ल्या अत्याचाराचीं जिवीं उदाहरणां दिसतात.
धर्म हो राष्ट्रकारी अशा भावनांनी आमकां वांटो घेवचो पडटलो. हें सांगतना तांणी फुडें सांगलें. भारतांत जायते सद्गुरू आसात आनी ते मनीसपण धर्माक चालना दितात. जे मेरेन सर्वधर्मसमभाव शिकोवपी हिंदू धर्म देशांत उरतलो ते मेरेन धर्मांत खंयच वांकडेपण उरचें ना, अशें म्हणटना ताणें जग्गी वासुदेव आनी माता अमृतानंदमयी हांचीं उदाहरणां दिलीं.
स्वामीजीचें काम पुराय संवसारा खातीर आसा अशें सुभाष फळदेसाय हांणी सांगलें. आनी हें काम पुराय संवसारांत पावोवपा खातीर प्रुडंट मिडियान डॉक्युमेंटरी वरवीं पुराय संवसारांत पावयलां. देखून ही डॉक्युमेंटरी आमच्या जिवितांत सकारात्मकताय घडोवन हाडटली.
ह्या वेळार आमदार संकल्प आमोणकार आनी हेर मानेस्तांनी आपले विचार मांडले.
सुरवेक राजेश नायक हांणी ही डॉक्युमेंटरी तयार करतना आयिल्ले अणभव सांगतना आपले वांगडी कुलदीप आजगांवकार, कृष्णा चारी, प्रवीण गांवकार हांची वळख करून दिली.
प्रुडंट मिडियाचे संपादक प्रमोद आचार्य हांणी ही डॉक्युमेंटरी तयार केल्या, तांचो राज्यपाल पी. एस. श्रीधरन पिल्लई हांचे हस्तुकीं शाल आनी सिद्धारुढ स्वामीची मूर्त भेटोवन भोवमान केलो.
निमाणे प्रमोद आचार्य हांणी सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
