भांगरभूंय | प्रतिनिधी
उमेश तळावणेंकारः सरकाराच्या धोरणाचो निशेध, खेळगड्यां खातीर उक्तें करपाची मागणी
भांगरभूंय । प्रतिनिधी
पेडणें: खेळां मैदान मोपा विमानतळा वयले एके कंपनीक भाड्यान दितलें, अशी खबर थळाव्या दिसाळ्यांनी उजवाडाक आयली तेन्ना थळावे आमदार प्रवीण आर्लेकार हांणी ताचेर प्रतिक्रिया दितना सांगिल्लें, हें इनडोर स्टेडियम आपूण खंयचेच स्थितींत भाड्यान दिवपाक तयार ना. हाचे आड आवाज काडटलों. आपूण लोकां वांगडा आसतलो, अशें तांणी जाहीर केल्लें. पूण आयज तांचो आवाज कोणे आडायला? इनडोर स्टेडियम भाड्यान दिवपाच्या सरकाराच्या धोरणाचो निशेध करून सरकारान हे खेळां मैदान लोकां खातीर तशेंच खेळगड्यां खातीर उक्तें करचें, अशी मागणी भोवजन समाजाचे प्रतिनिधी उमेळ तळावणेंकार हांणी केल्या.
राष्ट्रीय सर्ती निमतान पेडणेंच्या सावळवाड्यार इनडोर स्टेडियम उबारला. खेळां खात्यान ह्या स्टेडियमान खातीर 37 कोटी रुपया खर्च केल्यात. हें स्टेडियम आतां सरकारान मोपा विमानतळ जीएमआर विमानतळ कंपनीक भाड्यान वट्ट 18 म्हयन्यां खातीर दर म्हयन्याक 15 लाख रुपया ह्या भाडे तत्वाचेर दिलां. ज्या वेळार कोरोना म्हामारीचें संकश्ट ल्हवू ल्हवू वतालें तेन्ना खेळगड्यांच्या कलागुणांक संद दिवचे खातीर वा तांकां वेगवेगळें प्रशिक्षण दिवचे खातीर वा मैदानी खेळ खेळपा खातीर दिवपाची येवजण आशिल्ली. मात सरकारान 2022 ची विधानसभा वेंचणूक दोळ्यां मुखार दवरून तें थळावे खेळगडे वा पेडणें पालिकेक विस्वासांत घेनासतना भायले भायर मोपा विमानतळाचे जीएमआर कंपनीच्या सुरक्षा रक्षकां खातीर रावपाक भाड्यान दिलें, अशें तळवणेंकार हांणी सांगलें.
पेडणें इनडोर स्टेडियम भाड्यान दिवपाचे आसात, अशी खबर दिसाळ्यांनी उजवाडाक येताच खेळां मंत्री गोविंद गावडे हांणी अधिकारी आनी थळावे आमदार प्रवीण आर्लेकार हांचे सयत स्टेडियमाची पळोवणी केली. त्या वेळार मंत्री गावडे हांणी पत्रकारां कडेन उलयतना सांगलें, हें स्टेडियम भाड्यान न्हय जाल्यार खेळगड्यां खातीर उपलब्ध करून दितलों. स्टेडियमांतल्यो गैरसोयी पयस करून थंय राबितो प्रशिक्षण केंद्र थंय उबारतलों. स म्हयने जाले तरीय तांणी कसलीच कार्यवाही करूंक नाशिल्ल्यान थळाव्या खेळगड्यांनी नाराजी उक्तायल्या. मेळिल्ले म्हायती प्रमाण मोपा इनडोर स्टेडियमांत मोपा विमानतळाचे 500 सुरक्षा रक्षक रावपाक येतले. तातूंत 450 दादले जाल्यार 50 महिला सुरक्षा रक्षकांचो आस्पाव आसतलो.
प्रकरण मुख्याधिकाऱ्यां कडेनः नगराध्यक्ष
पेडणें इनडोर स्टेडियमाक पालिकेन ना हरकत दाखलो दिवंक ना वा राबितो दाखलोय दिवंक ना. अशें स्थितींत सरकार ती इमारत खाजगी कंपनी कशी दिवपाक शकता? स्टेडियमाच्या बांदकामाची फी म्हूण खेळां खात्या कडल्यान अजून पावणे दोन कोटी रुपया पालिकेक येवपाचे आसात. हें प्रकरण मुख्याधिकारी हांचे कडेन आसा. आनी ताचेर सध्या सुनावणी चालू आसा, अशें पेडणेंचे नगराध्यक्ष माधव सिनाय देसाय हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
