पुर्वजांची जमीन कश्शेंच दिवचे नात

सांग्यार पत्रकार परिशदेक हाजीर आशिल्ले आयआयटीक विरोध करपी शेतकार. (संदीप मापारी)

भांगरभूंय | प्रतिनिधी

सांग्यार शेतकारांचो आयआयटीक विरोध; प्रकल्प दुसरे कडेन व्हरपाची मागणी

भांगरभूंय । प्रतिनिधी

सांगें: आमच्या पुर्वजांनी राखून दवरिल्ली जमीन आमी कशेच दिवचे नात. मंत्री सुभाश फळदेसाय हांची दादागिरी आनी राजेश गांवकार हांची धमकी आमी खपोवन घेवचे नात, अशी शिटकावणी सांग्या वयल्या शेतकारांनी बुधवारा दिली.

आयआयटी विशीं समजून घेवपा खातीर 17 जुलयाक शेतकारांनी बसका आयोजीत केल्ली. पूण ती बसका सुरू जाताच आयआयटी समर्थकांनी ती उध्वस्त केल्ली. वातावरण तापिल्लें. त्या वेळार पुलिसांनी प्रेक्षकांची भुमिका घेतिल्ल्यान सभाघरांतली झगडीं रस्त्यार पाविल्ली. आयोजकांक बसका रद्द करची पडिल्ली. होच विशय फुडें व्हरपा खातीर बुधवारा शेतकारांनी शेतांतूच पत्रकार परिशद घेवन आयआयटीक विरोध केलो.

हे आदीं आमदार प्रसाद गांवकार हांणी हो आयआयटी प्रकल्प सांग्यार हाडिल्लो. त्या वेळार ह्याच लोकांनी ताका विरोध केल्लो. आयज त्याच लोकांक आयआयटीचो पुळको कित्याक, असो प्रस्न ह्या वेळार शेतकारांनी उपस्थीत केलो.

मारिया क्रूज हांणी सांगलें, सुभाष फळदेसाय शेतकारां मदीं धोशी घालपाक सोदता. हे जमनीचो विशय न्यायालयांत आसतना थंय आयआयटी कशी येवपाक शकता? आयआयटी जाय म्हणपी समर्थक माया जांगळी हांणी सरकारी खूब जमीन आडायल्या. बायो भंडारीच्या गांवांत ती व्हरची ना जाल्यार धमकी दिवपी राजेश गांवकार हाच्या गांवांत व्हरची. त्या राजेश गांवकार हाचे धमकेक आमी शेतकार  भियेनात, अशें क्रूज हांणी सांगलें.

आयज ह्या विशयाचेर चंद्रकांत आनी सावित्री कवळेंकार हांचें नांव हे लोक पेड्ड्यार करतात. पूण तीं दोगांय केन्नाच ह्या प्रकरणांत पडूंक नात. आयज ह्या शेता खातीर, ह्या दोंगरा खातीर, हो सोबीत सैम वाटावपा खातीर, आमी कितेंय करपाक तयार आसात. आयज 48 वर्सां जालीं तरीय धरण पिडेस्तांचे प्रस्न सुटावे जावंक नात, जाल्यार सरकाराचेर कसो विस्वास दवरपाचो, असो प्रस्न क्रूज हांणी उपस्थीत केलो.

शेतकार मिल्टन फर्नांडीस हांणी सांगलें, मंत्री फळदेसाय हे जमनीर सैम, दोंगर पेड्ड्यार करून आयआयटी हाडून चुकीची गजाल करपाक सोदता. शेतकारांक नाका जाल्यार आयआयटी कित्याक? आमचे मदीं किजिलां लावन कांय लोक आपलें सादोवंक सोदतात. आयआयटी जायच जाल्यार आयआयटी समर्थकांनी ती आपल्या गांवांत व्हरची.

संजय मापारी हांणी सांगलें, आमच्या पुर्वजांनी आमचे खातीर राखून दवरिल्लें शेत आमी दिवचे नात. आयआयटी जायच जाल्यार ती भाटी, उगें वाठारांत व्हरची. ह्या वेळार जेनवी डायस, कार्लोत आनी खूबशा शेतकारांनी आपले विचार मांडले. आमकां जाय, आमकां जाय, आमची जमीन आमकां जाय, अशा घोशणांनी पत्रकार परिशद सोंपली.

गुंडागिरी सोंसून घेवचे नातः क्रूज

मुख्यमंत्री डॉ. प्रमोद सावंत हे सैममोगी. शेतकारां खातीर तांच्यो खूबश्यो येवजण्यो आसात. तांणी हो प्रकल्प दुसरे कडेन व्हरचो. कोणेय गुंडागिरी करून हे जमनीचेर प्रकल्प उबारपाचो यत्न केलो जाल्यार शेतकार ओगी बसचे नात, अशी शिटकावणी मारिया क्रूज हांणी दिली.