भांगरभूंय | प्रतिनिधी
साविओ कुतिन्हो: रॅस्टोरंण्टाची गरज ना
मडगांव: मडगांवां पार्कींग प्रकल्प इमारतींत रॅस्टोरंण्टाची गरज नासतना सोय करतात. हाका लागून लोकांक आपल्या वाहनांची पार्कींग सोय जावचे बदला रॅस्टोरंण्टांत येवप्यांची सोय जातली. रॅस्टोरंण्टा विशीं पालिका मंळान थाराव घेतिल्लो ना. करपाचेंच आसत जाल्यार पालिकेचीं कागदपत्रां दवरपा खातीर सुवात करची. अशें जालें ना जाल्यार संबंदितां कडेन कागाळ करतले आनी गरज पडल्यार न्यायालयांत वतले अशें शॅडो कावन्सील फॉर मडगांवचे संयोजक साविओ कुतिन्हो हांणी सांगलें.
मडगांवां पार्कींग प्रकल्पाचो मुद्दो परतून एकदां चर्चेक आयलां. ह्या पार्कींग प्रकल्पाचे इमारतींत रॅस्टोरंण्ट उबारपाचे यत्न सुरू आसात. आमदार दिगंबर कामत हांणी लेगीत रॅस्टोरंण्ट आयल्यार पालिकेच्या महसुलांत वाड जातली अशें सांगिल्लें.
शॅडो कावन्सिलाचे संयोजक साविओ कुतिन्हो हांणी पत्रकारां कडेन उलयतना सांगलें की, मडगांव पालिका मंडळा कडल्यान पार्कींग प्रकल्पांत रॅस्टोरंण्टाची वेवस्था आसची हे विशींचो केन्नाच थाराव घेतिल्लो ना. उपरांत लेगीत पालिकेचे सुवातेंत उबारतल्या पार्कींग प्रकल्पाचे इमारतींत रॅस्टोरंण्ट घालपाचो यत्न सुरू आसा. मडगांवच्या लोकांक वाहनां उबीं करपा खातीर सुवात नाशिल्ल्यान भोवमजली पार्किंगेचो प्रकल्प उबारतात. पूण रॅस्टोरंण्टा सारको वेवसायीक प्रकल्प पार्कींग प्रकल्पांत हाडल्यार भोवमजली पार्कींग प्रकल्पाचो वापर हो लोकां परस रॅस्टोरंण्टाकूच जातलो.
पालिकेक भोवमजली पार्कींग प्रकल्पांत सुवात आसल्यार तांणी पालिकेचीं कागदपत्रां दवरपा खातीर सुवात उपलब्ध करची. पालिकेचे रेकॉर्ड रुम कागदपत्रांनी भरलां. तांकां योग्य सुवात मेळटली. पार्कींग प्रकल्पांत रॅस्टोरंण्ट हाडपाचो यत्न जाल्यार संबंदीत खात्या कडेन कागाळ करतले. तशेंच गरज पडल्यार न्यायालयांतूय वतले अशी शिटकावणी कुतिन्हो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
