पाकिस्तानाच्या जैतांत शफीक पर्जळ्ळो

भांगरभूंय | प्रतिनिधी

युवा बॅट्समन अब्दुल्लाह शफीकाच्या नाबाद 160 धांवड्यांचे खेळी नेटार पाकिस्तानान येजमान श्रीलंके आडची पयली टॅस्ट 4 विकेटींनी जिखली. श्रीलंकेन पाकिस्ताना मुखार जैता खातीर 342 धांवड्यांची मोख दवरिल्ली. पाकिस्तानान ती 6 विकेटी वगडावन मेळयली.

पयल्या डावांत श्रीलंकेन 222 धांवड्यो केल्ल्यो, ताका जाप दितना पाकिस्तानान 218 धांवड्यो केल्ल्यो. बाबर आजमान 119 धांवड्यांची खेळी केल्ली. ताचे खेरीत एकाय बॅट्समनाक 20 धांवड्यो लेगीत करपाक जमूंक नाशिल्ल्यो. बाबरान श्रीलंकेक व्हड आघाडी घेवपा पसून आडायलो आसलो तरी श्रीलंकेच्या स्पिनरां मुखार पाकिस्तान बॅकफुटाचेर आशिल्लो.

श्रीलंकेन दिनेश चंदीमल (नाबाद 94), कुशल मॅंडीस (76) आनी ओशादा फर्नांडीस (64) हांच्या अर्द शेंकड्यां नेटार दुसऱ्या डावांत 337 धांवड्यो करून पाकिस्तानाक जैता खातीर 342 धांवड्यांची व्हड मोख दिली. पूण, शफीकाच्या जबरदस्त बॅटिंगे नेटार पाकिस्तानान ती मेळयली.

ओपनर शफीकाक सगल्यांत पयलीं दुसरो ओपनर इमाम उल हकाची (35) साथ मेळ्ळी. दोगांयनी पयले विकेटी खातीर 87 धांवड्यांची म्हत्वाची भागिदारी केली. हे भागिदारीक लागून पाकिस्तानाचो जैताचो मार्ग सोंपो केलो. ही जोडी फुटल्या उपरांत अझर अली (6) रोखडोच बाद जालो. पाकिस्तानाचो डाव गडगडटलो अशें दिशिल्लें. पूण, शफीकान मुखेली बाबरा वांगडा म्हत्वाची भागिदारी केली. बाबरान 55 धांवड्यो केल्यो.

काल निमाण्या दिसा पाकिस्तानाक जैता खातीर 120 धांवड्यांची गरज आशिल्ली. विकेटकीपर बॅट्समन मोहम्मद रिजवानान 40 धांवड्यांची जलद खेळी केली. पूण, तो बाद जाल्या उपरांत पाकिस्तानान दोन विकेटी रोखड्योच वगडायल्यो. आगा सलमान (12) आनी हसन अली (5) बाद जाल्या उपरांत मोहम्मद नवाजान (नाबाद 15) एक बाजू सांबाळून धरली. अखेरेक शफीकान चवको मारून पाकिस्तानाक जैत मेळोवन दिलें.

श्रीलंके वतीन प्रभात जयसुर्यान चार विकेटी घेतल्यो. ताका सोडलो जाल्यार हेर बॉलर अपेशी थारले. रमेश मॅण्डीस आनी धनंजय डिसिल्वा हाका दरेकी एक विकेट फावो जाली.

मुखेली डिमुश करुणारत्ने हाणें विकेट मेळोवपा खातीर फॉर्मांत आशिल्ल्या जयसुर्या कडल्यान 56.2 ओव्हरी करून घेतल्यो. पूण, ताची ही रणनिती चलूंक ना.

दोन मॅचींचे माळेंत पाकिस्तानान 1-0 अशी आघाडी घेतली. माळेंतली दुसरी आनी निमाणी मॅच 24 जुलयाक गॉलांतूच सुरू जातली.