भांगरभूंय | प्रतिनिधी
पणजी: गोंयांत फाटल्या धा वर्सांत जाल्लीं विकासकामां हाचे आदीं केन्नाच जावंक नात. भाजप अंत्याेदय तत्वाचेर काम करता. हाका लागून विधानसभेच्या 2027 चे वेंचणुकेंत गोंयांत परतून एकदां भाजपाचें सरकार येतलें असो विस्वास मुख्यमंत्री डॉ. प्रमोद सावत हांणी उक्तायलो.
बुधवारा सांता क्रुझ मतदारसंघांत जाल्ल्या कार्यकर्त्यांच्या मेळाव्यांत ते उलयताले. ह्या वेळार प्रदेशाध्यक्ष दामू नायक, खासदार सदानंद शेट तानावडे, आमदार रुडॉल्फ फर्नांडीस आनी हेर पदाधिकारी हाजीर आशिल्ले.
मुख्यमंत्र्यांनी म्हणलें, भाजप सगल्यांचो विकास करता. आमचो पक्ष जात आनी धर्म पळयना. मामी फर्नांडीस आमदार आसतना एक रस्तो मंजूर करून घेवपा खातीर तांकां उपोशणाक बसचें पडिल्लें. तेन्नाच्या काँग्रेस सरकारान मामींचेर अन्याय केलो. काँग्रेस स्वताच्या बायल आमदाराचेर अन्याय करता आसत जाल्यार तो पक्ष कितलो महाभयानक आसा हें लक्षांत येता. हाचें उरफाटें भाजपांत अशी कोणाकूच वागणूक दिनात.
तांणी म्हणलें, भाजप युवा शक्ती, नारी शक्ती, किसान शक्ती आनी गरीब कल्याण ह्या तत्वांचेर चलता. भाजपांत हिंदू, मुस्लीम, क्रिस्तांव असो भेदभाव करिनात. गोंयांत नोकरी करूंक इत्सूक आशिल्ली व्यक्ती बेरोजगार उरची ना हाची आमी गॅरंटी दिता. मात अशे व्यक्तीक आपलो कुशळटाय विकास करप गरजेचो आसा. सांता क्रुझ मतदारसंघांतल्यो समस्या रोखडेच सोडयतले. हे खातीर आमदार लेगीत यत्न करीत आसात. मतदारसंघांत रस्त्यार कोयर उडोवपाचो प्रकार बंद जावंक जाय अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
