भांगरभूंय | प्रतिनिधी
दामोदर शिरोडकार: आमदार आनी मुख्यमंत्री हांचे कडेन चर्चा करतलों
मडगांव: मडगांव पालिकेंतल्या पदांची भरती रद्द करपा विशीं शार उदरगत खात्याच्या सचिवा कडल्यान आयिल्ल्या निर्देशा प्रमाण जिल्हो पालिका प्रशासना कडल्यान पत्र आयिल्ल्याचें मुख्याधिकाऱ्यान सांगिल्लें. ताचेर निर्णय स्थगीत दवरपाक सांगिल्लो. तरी लेगीत हीं पदां रद्द जालीं जाल्यार ताची म्हायती नगराध्यक्ष ह्या नात्यान आपणाक खबर ना. हे विशीं आमदार दिगंबर कामत आनी मुख्यमंत्री डॉ. प्रमोद सावंत हांचे कडेन चर्चा करतलों अशें नगराध्यक्ष दामोदर शिरोडकार हांणी सांगलें.
मडगांव पालिकेंतल्या पदांचीं भरती रद्द केल्ल्याची म्हायती आपणाक मेळ्ळ्या. मुख्याधिकारी गौरीश शंखवाळकार हांणी पदांची भरती रद्द केल्ली आसल्यार ताची म्हायती आपणाक ना. मुख्याधिकाऱ्यान कांय दिसांं पयलीं आपणाक सांगिल्लें की, आपणाक पदां रद्द करपा विशीं डीएमए कडल्यान पत्र आयलां. कोणूय मंत्री वा शार उदरगत सचिवा कडल्यान जिल्हो पालिका संचालनालयाक सांगून तांकां पत्र धाडपाक सांगिल्लें आसूं येता. ताचेर आपणे तांकां निर्णय स्थगीत दवरपाक सांगिल्ल्याचें नगराध्यक्ष शिरोडकार हांणी म्हणलें.
जिल्हो पालिका प्रशासना कडल्यान आयिल्ल्या पत्राचेर आपणें शेरो दिला की, पालिका मंडळ ही स्वतंत्र संस्था आसा. पालिकेंतलीं रितीं पदां भरपाचो अधिकार हो पालिकेचोच आसता. मुख्याधिकाऱ्यांक वरिश्ठां कडल्यान चेपण आयिल्लें आसूं येता. ताका लागून तांणी पदां रद्द केल्ल्याचें पत्र धाडिल्लें आसुये. पूण ज्या वेळार पदांच्या भरतीची जायरात काडिल्ली, त्या वेळार मुख्याधिकारी आनी नगराध्यक्ष ह्या दोनूय पदां वयल्या व्यक्तीचे संमती उपरांत काडिल्लीं. पदांची भरती करपाची फायल अजून लेगीत आपणा कडेन आसा. आपणें ताचेर सय मारूंक नाशिल्ल्याचें तांणी स्पश्ट केलें.
शार उदरगत सचीव पालिका चलयतले?
मडगांव पालिकेचे मुख्याधिकारी गौरीश शंखवाळकार हांचे कडल्यान पदांचे भरतीची जायरात फाटीं घेतल्या. हे विशीं उलयतना नगराध्यक्ष दामोदर शिरोडकार हांणी सांगलें, पालिकेंतली पदांची भरती प्रक्रिया पालिका मंडळा कडल्यान करतात. शार उदरगत सचीव पणजेंत बसून पालिका चलयतले? असो प्रस्नूय दामोदर शिरोडकार हांणी केलो.
भरती रद्द करपा खातीर आपणें सय केल्ली ना
मडगांव पालिका ही भाजपा शासीत पालिका आसा. मडगांव पालिकेंतल्या नगरसेवकांनी भाजपांत प्रवेश केला. पालिकेंतल्या पदांची भरती रद्द जाता आनी नगराध्यक्षांकूच हाची म्हायती नासल्यार हांव आनीक कितें सांगू. आठ दिसां पयलीं मुख्याधिकाऱ्या कडल्यान भरतीची फायल धाडिल्ली, ताचेर आपणें सय केल्ली ना. जिल्हो पालिका प्रशासना कडेन चर्चा केल्यार शार उदरगत सचिवां कडेन हे विशीं चर्चा करतले अशें सांगलें. उपरांतूय कितेंय घडिल्लें आसत जाल्यार ताची म्हायती ना. आमदार दिगंबर कामत आनी मुख्यमंत्री डॉ. प्रमोद सावंत हांचे कडेन चर्चा करतलों अशें नगराध्यक्ष दामोदर शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
