भांगरभूंय | प्रतिनिधी
साळावलीय ओव्हर फ्लो जावपाचे वाटेर
भांगरभूंय । प्रतिनिधी
पणजीः घोग्यांनी पडपी पावसाक लागून पंचवाडी धरण पुराय भरलां. साळावली धरण लेगीत ओव्हर फ्लो जावपाचे वाटेर आसा. पावस असोच पडत रावलो जाल्यार फाल्यां मेरेन साळावली धरण लेगीत उपाय भरतलें. अंजुणें सोडून हेर धरणांतलो उदकाचो सांठो व्हड प्रमाणांत वाडला.
गोंय हवामान विभागान दिल्ले शिटकावणे प्रमाण बुधवारा लेगीत सकाळच्यान घोग्यांनी पावस पडटालो. मंगळारच्यान आतां मेरेन गोंयांत 7 इंच पावसाची नोंद जाल्या. 1 जून ते 19 जुलय ह्या काळांत 73 इंचां परस चड पावस पडला. सरासरी पावसाचे तुळेंत हो पावस सुमार 14 टक्के चड आसा. हवामान विभागान आयच्यान फुडले दोन दीस ऑरेंज अलर्ट जारी केला. शुक्रार मेरेन उटंगाराचो पावस कायम उरपाची शक्यताय आसा.
मजगतीं, फाटल्या दोन दिसां सावन सेगीत पडपी पावसाक लागून गोंयची लोकजीण परतून एकदां विस्कळीत जाल्या. शार वाठारांतले मुख्य तशेंच भितरले रस्ते उदका पोंदा गेल्यात. खूबशा म्हालांनी झाडां, घरां तशेंच विज सरयांचेर कोसळिल्ल्यान थळाव्या लोकां वांगडाच वीज खात्याचें व्हड प्रमाणांत लुकसाण जालां. खूबशा वाठारांनी रस्त्याचेर पडिल्ल्या झाडांक लागून येरादारीचेर परिणाम जालो. उजो पालोवपी दळाचे जवान दीसरात वावर करून हीं झाडां कुशीक काडपाचें काम करतात. मजगतीं, सांगें, केपें, मडगांव, म्हापशें ह्या वाठारांनी पावसान अच्छेव मांडला. आतां मेरेन सगळ्यांत चड पावसाची नोंद सांग्यार (81 इंच) जाल्या. ते उपरांत केपें (80 इंच), मडगांव (78 इंच), म्हापशें (73 इंच), वाळपय (71 इंच) ह्या केंद्रांचो नंबर लागता.
धरणांतलो उदकाचो सांठो (टक्क्यांनी)
साळावली 97 टक्क्यां परस अदीक
अंजुणें 36
आणठाणे 86
पंचवाडी 100
चापोली 75 गावणें 60
आतां मेरेनचो पावस (इंचांनी)
म्हापशें 73
पेडणें 71
फोंडें 68
पणजी 69
पोरणें गोंय 59
सांखळी 67
वाळपय 71
काणकोण 70
दाबोळी 65
मडगांव 78
मुरगांव 65
केपें 80 सांगें 81
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
