भांगरभूंय | प्रतिनिधी
सर्बियाच्या नोवाक जोकोवीचान विम्बल्डनाचे फायनलींत सुवात मेळयली. ताणें सेगीत चवथे खेपे विम्बल्डनाचे फायनलींत सुवात मेळयली. दुसरे सेमी फायनलींत ताणें ब्रिटनच्या कॅमरन नोरीक 2-6, 6-3, 6-2 आनी 6-4 अशा चार सेटांनी हारयलो.
35 वर्सां पिरायेचो जोकोवीच आतां मेरेन 20 ग्रॅण्ड स्लॅम किताब जिखला. आयज तो जिखपाक येसस्वी थारता जाल्यार दादल्यांच्या एकोड्या गटांत सगल्यांत चड ग्रॅण्ड स्लॅम किताब जिखपाचे वळेरेंत तो दुसरे सुवातेर पावतलो. राफायल नादाल 22 किताबा सयत पयले सुवातेर आसा. दुखापतीक लागून पयले सेमी फायनलींत तो खेळूंक नाशिल्लो. तिसरे सुवातेर स्वित्झर्लेण्डाचो दिग्गज खेळगडो रोजर फॅडरर आसा. ताणें 20 किताब जिखल्यात.
जोकोवीचाची सुरवात बरी जाली ना. पयलो सेट तो सहज हारलो. पूण, उपरांत मॅचींत पुनरागमन करतना फुडले तिनूय सेट जिखले. फायनलींत तो ऑस्ट्रेलियेच्या नीक किर्गियास आड खेळटलो. पयले सेमी फायनलींत नादालान दुखापतीक लागून फाटीं सरपाचो निर्णय घेतल्या उपरांत किर्गियोसाक फुडली चाल मेळिल्ली.
जोकोवीच सेगीत तीन खेपे आनी वट्ट स खेपे विम्बल्डन सर्त जिखल्या. 2011, 2014, 2015, 2018, 2019 आनी 2021त चॅम्पियन थारिल्लो. कोरोनाक लागून 2020त सर्तीचें आयोजन जावंक नाशिल्लें. हाचे खेरीत जोकोवीच 9 खेपे ऑस्ट्रेलियन ओपन, तीन खेपे अमेरिकन ओपन आनी दोन खेपे फ्रॅंच ओपन किताब जिखला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
