भांगरभूंय | प्रतिनिधी
कुठ्ठाळी ग्रामसभेंत घेतलो निर्णय; कोयर उडोवप्यां आड करची कारवाय
वास्को: कुठ्ठाळेची टपाल कचेरी, विजेचें बील भरपी कचेरी, पुलीस चौकी रोखडीच दुसरी कडेन एका पाख्या खाला हालोवपाचो निर्णय कुठ्ठाळी ग्रामसभेंत घेतलो. ह्या वेळार हाजीर आशिल्ले कुठ्ठाळीचे आमदार अँथनी वाझ हांणी लेगीत ह्यो कचेऱ्यो हालोवपाची सामकी गरज आशिल्ल्याचें सांगलें. जाल्यार कुठ्ठाळी पंचायत वाठारांत कोयराची समस्या दिसान दीस वाडत आशिल्ल्यान रस्त्याचे कुशीक कोयर उडोवप्यां आड कारवाय जावपाची गरज आशिल्ल्याचें कुठ्ठाळी जैवविविधताय वेवस्थापन समितीचे वांगडी लेस्ली गामा हांणी सांगलें.
कुठ्ठाळी ग्रामसभेंत विवीध विशयांचेर चर्चा जाली. ऑक्टोबर 2021ची खाशेली ग्रामसभा घेवंक नाशिल्ले खातीर चर्चा जाली. ही ग्रामसभा फाटल्या ऑक्टोबरांत घेवंक मेळूंक नाशिल्ल्यान ती जानेवारी 2022क उपरांत एप्रील 2022क घेवपाचें थारिल्लें. पूण ती अजून घेतिल्ली ना. तेन्ना ती खाशेली ग्रामसभा आतांचे ग्रामसभेक जोडुनूच घेवया अशें सरपंच सेनिया परेरा हांणी सुचोवणी मांडली.
पूण हाजीर आशिल्ल्यांनी ती मान्य केली ना. ती फुडल्या म्हयन्यांत घेवपाची मागणी तांणी केली. तशेंच हे ग्रामसभेंत टपाल कचेरी, विजेचें बील भरपी कचेरी, पुलीस चौकी संबंदी चर्चा केली. ह्यो कचेऱ्यो आनी पुलीस चौकेची दुर्दशा जाल्ल्यान लोकांची व्हड प्रमाणांत गैरसोय जाता. ताका लागून त्यो दुसरी कडेन एकाच पाख्या खाला हाडपाचो निर्णय घेतलो.
जिल्हो पंचायत वेंचणुकेंत दुसऱ्या क्रमांकाची मतां मेळयिल्ले आनी जैव विविधताय वेवस्थापन समितीची वांगडी गामा हांणी कोयराचे समस्ये विशीं हुस्को उक्तायलो. गांवांनी रावपी स्थलांतरीत नागरीक कामार वतना आपले कडलो कोयर खंयूय उडयतात. ताका लागून सगले कडेन कोयराचें साम्राज्य पातळ्ळां. ही गजाल पर्यावरणाक हानिकारक आशिल्ल्यान हो प्रकार बंद करपा खातीर आपूण यत्न करतलों अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
