भांगरभूंय | प्रतिनिधी
भांगरभूंय । प्रतिनिधी
पोरणे गोंयः चिंबल जंक्शना कडेन फ्लायओव्हर बांदपाक दोन वर्सां लागतलीं अशी म्हायती आयतारा जाल्ले चिंबल पंचायतीचे ग्रामसभेंत सरपंच संदेश शिरोडकार हांणी दिली. ह्या विशयाचेर ग्रासभेंत म्हायती दितना कंत्राटदारा कडल्यान मेळिल्ल्या बार चार्टा वयल्यान फ्यायओव्हराक दोन वर्सां लागतलीं अशेंं स्पश्ट जालां अशें तांणी सांगलें.
ह्या फ्लायओव्हराचें काम जाता तितल्या बेगीन सुरू करपा खातीर पंचायत मंडळान संबंदीत सरकारी खात्या कडेन संपर्क सादलो अशें सरपंचान सांगलें. ग्रामसभेंत कोयर एकठांय करपाच्या विशयाचेर चर्चा जाली. कांय वॉर्डांनी नितळसाण दवोरपा कडेन आडनदर जाता अशें कांय ग्रामस्थांनी पंचायत मंडळाचे नदरेक हाडून दिले. पंचायतीन कोयर वेवस्थापन समिती स्थापन केल्या. तांचे बसकेंत कोयराच्या विशयाचेर खोलायेन चर्चा करून उपाय सोदून काडटले अशें सरपंचान सांगलें.
चिंबल पंचायत वाठारांत बांगलादेशी आसात असो दुबाव आसा. ताका सोदून काडपा खातीर सर्वे करपाची मागणी रिव्होल्युशनरी गोवन्साच्या वांगड्यांनी केली. इंदिरा नगरांत बांगलादेशींचो राबितो आसपाची शक्यताय आसा अशें अजय खोलकारान सांगलें.
पंचायतीक सर्वे करपाचो आसल्यार आमी ताकां मजत करपाक तयार आसात अशें खोलकारान सांगलें. पंचायत इमारतीची तिसरी माळी बांदपा खातीर सरकारान कडल्यान मेळिल्ल्या 50 लाख रुपयाचो वापर करतले अशें सरपंच शिरोडकार हांणी ग्रामसभेक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
