भांगरभूंय | प्रतिनिधी
मुरगांव पालिकेचें भाडेकारांक सांगणें
वास्को: घरपटी भरिल्ल्याची पावती घर धनयां कडल्यान हाडात, तेन्नाच उत्पन्नाचो दाखलो मेळटलो अशी भुमिका मुरगांव पालिकेन घेतिल्ल्यान भाड्यान रावपी लोकां मुखार मोटो प्रस्न उबो रावला. घर धनी पावती दिवपाक तयार ना, आनी पावते बगर मुरगांव पालिका उत्पन्न दाखलो दिवपाक तयार ना. ताका लागून जांणी शिश्यवृत्ती आनी हेर गजालीं खातीर उत्पन्नाचे दाखले मागल्यात तांणी निरशेणी उक्तायल्या. घर धनयान घरपटी भरली ना जाल्यार तातूंत आमचो कसलो दोश असो प्रस्न तांणी उपस्थीत केला.
पंचायत मंत्री मॉवीन गुदिन्हो हांणी पंचायतीची थकबाकी तशेंच विवीध कर जे भरिनात तांकां दाखलो दिवचो न्हय अशे आवाहन केल्लें. ताचे फाटल्यान घर धनयांनी, दुकान धनयांनी आनी हेरांनी विवीध कर भरचो. जेणे करून पंचायतींक महसूल मेळून विकासकामां हातांत घेवपाक मजत जातली हो हेतू आशिल्लो.
पूण मुरगांव पालिकेन एक पावल मुखार घालून भाड्यान रावपी लोकांकूच लक्ष्य केलां. मुरगांव पालिके कडेन उत्पन्नाच्या दाखल्या खातीर जांणी अर्ज केल्यात, तांकां घरपटी, थकबाकी भरिल्ल्याची पावती हाडपाक सांगतात. जे भाड्यान रावतात तांकां घर धनया कडल्यान संबंदीत पावत्यो हाडपाक सांगलां.
जर भाडेकारान घर धनया कडेन पावती मागली जाल्यार, ताका तर पावती मेळचीच ना वयल्यान घर सोडचे पडुये ही भिरांत भाडेकाराक आसा. तशेंच भाडेकाराच्या उत्पन्न दाखल्या खातीर घर धनया कडल्यान पावती हाडपाक सांगप म्हणल्यार मुरगांव पालिकेचेंच अतीच जालें अशीय प्रतिक्रिया उक्तायतात.
उत्पन्न दाखलो मेळ्ळो ना जाल्यार शिश्यवृत्ती आनी हेर सुविधांचेर उदक सोडचें पडटलें. ताका लागून हातूंतल्यान मार्ग कसो काडचो हे खातीर संबंदितांची धांवपळ उडल्या. ह्या प्रकरणांत मुरगांव पालिकेन भाडेकारांक गरजे भायर वेठीक धरचो न्हय अशी प्रतिक्रिया व्यक्त जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
