भांगरभूंय | प्रतिनिधी
उज्ज्वला लाबार्थ्यांक 717 रुपया
पणजी : घरगुती एलपीजी सिलिंडराचें मोल 200 रुपयांनी उणें करपाच्या केंद्राच्या निर्णयाचो गोंयांतल्या 5 लाख 90 हजार एलपीजीधारक कुटुंबाक लाव जातलो. ह्या कुटुंबांक आतां सिलिंडरा खातीर 917 रुपया फारीक करचे पडटले. तशेंच प्रधानमंत्री उज्ज्वला येवजणेचे गोंयांत 1,436 लाबार्थी आसात. उज्ज्वला येवजणेच्या लाबार्थ्यांक एलपीजी सिलिंडर 717 रुपयांक मेळटलो.
घरगुती एलपीजी सिलिंडराचें मोल 200 रुपयान उणो करपाचो म्हत्वाचो निर्णय केंद्रीय मंत्रीमंडळान मंगळारा घेतलो. राजस्थान, मध्य प्रदेश आनी हेर राज्यांनी जावपी विधानसभा वेंचणुकांच्या फाटभुंयेर केंद्र सरकारान हो निर्णय घेतला, अशी चर्चा आसा.
रक्षाबंधन आनी ओणम उत्सवाचे फाटभुंयेर प्रधानमंत्री नरेंद्र मोदी हांणी देशांतल्या बायलांक दिल्ली ही भेट आसा, अशें केंद्रीय मंत्री अनुराग ठाकूर हांणी पत्रकार परिशदेंत सांगलें. भाजपाचे राष्ट्रीय अध्यक्ष जे. पी. नड्डा हांणी ह्या निर्णयाक येवकार दिला. प्रधानमंत्री नरेंद्र मोदी हांचो हो निर्णय देशवासीयांक थाकाय दिवपी आसा, अशें ट्विट तांणी केलें.
गोंयांत उज्ज्वला येवजणेचे 1,436 लाबार्थी आसात, अशी म्हायती ऑयल कंपनींचे समन्वय अधिकारी सुनीलकांता महाराणा हांणी दिली. राज्यांत वट्ट 5 लाख 90 हजार जोडण्यो आशिल्ल्याचे तांणीच सांगलें.
फाटलीं बरीच वर्सां गॅस सिलिंडराचें मोल मोल वाडटाले आनी उपरांत उणें जाताले. पूण 200 रुपयांनी मोल केन्नाच उणें जावंक ना. हाका लागून हो निर्णय थाकाय दिवपी आसा.
8 मे 2022 रोजी सिलिंडराचे मोल वाडून एक हजारा वयर पावलें. 8 मे 2022 दिसा परतून मोल वाडून सिलिंडर 1,013.50 रूपया जालो. हाचे उपरांत लेगीत मोल वाडून 1,117 रुपयांचेर पावलें.
राज्यांत 5.90 लाख एलपीजी जोडण्यो
गोंयांत घरगुती एलपीजी सिलिंडराच्यो 5 लाख 90 हजार जोडण्यो आसात. दरेका कुटुंबा कडेन किमान एक तरी एलपीजीची जोडणी आसा. सध्या गोंयांत घरगुती सिलिंडरा खातीर 1,117 रुपया फारीक करचे पडटात. आतां 200 रुपया उणें जाले उपरांत सिलिंडर 917 रुपयांक मेळटलो.
उज्ज्वला येवजणेचे 1,436 लाबार्थी
गोंयांत उज्ज्वला येवजणेचे 1,436 लाबार्थी आसात. उज्ज्वला येवजणेच्या लाबार्थ्यांक एलपीजी सिलिंडर 717 रुपयांक मेळटलो. सध्या उज्ज्वला येवजणे खाला सिलिंडर 200 रुपयांनी सवाय मेळटा. तातूंत आतां आनीक 200 रुपयांचो लाव उज्ज्वला लावधारकांक मेळटलो. उज्ज्वला येवजणेच्या लाबार्थ्यांक 400 रुपयांचो लाव मेळटलो. ताका लागून उज्ज्वला लाबार्थ्यांक सिलिंडरा खातीर 717 रुपया खर्च करचे पडटले. राज्य सरकाराचे 200 रुपया आनी केंद्र सरकाराचे 200 रुपया मेळून वट्ट 400 रुपयां बँक खात्यांत जमा जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
