भांगरभूंय | प्रतिनिधी
जीएसटी फारीक करूंक नाशिल्ल्यान बोवाळ
पणजीः गोंय सरकाराच्या पर्यटन खात्यान एप आदारीत टॅक्सी सेवा दिवपाक निवड केल्ल्या फ्रोटा मायल्स प्रा. लिमिटेड कंपनीच्या गोवा मायल्सा कडल्यान सरकाराक फावो जावपी सुमार 3.34 कोटी रुपयांचो जीएसटी कर अजुनूय फारीक जावंक ना. वेलेन्सियो रॉड्रिगीस हांणी हो घोटाळाे उक्ताडार हाडला. आयज पर्यटन मंत्री रोहन खंवटे हांणी दिल्ले म्हायती वयल्यान गोवा मायल्सा कडल्यान जीएसटी वसूल करपाक नोटीस धाडल्या अशें तांणी सांगलें.
एके वटेन 7 ऑगश्ट 2018 सावन गोंय पर्यटन खात्यान गोवा मायल्साची टॅक्की एप सेवा सुरू केल्या. ही कंपनी खाजगी आसली जाल्यारूय ही सेवा गोंय पर्यटन खात्या वतीन सुरू अाशिल्यान हे सेवेक सरकाराचो पालव आसा. अशा वेळार ही कंपनी गिरायका कडल्यान जीएसटी वसूल करून ती सरकाराक कशी कितें फारीक करना, असो प्रस्न वेलेन्सियो रॉड्रिगीस हांणी विचारला.
गोवा मायल्साच्या जीएसटी थकबाकी विशीं आपणें येरादारी खातें, पर्यटन खातें आनी जीएसटी आयुक्तां कडेनूय कागाळ केल्या, पूण कोणूच कितें कारवाय करपाक सोदना, अशेंय रॉड्रिगीश हांणी ‘भांगरभूंय कडेन उलयताना सांगलें.
गोंय विधानसभेंत फटीची म्हायती
गोवा मायल्साच्या विशया वयल्यान आदले पर्यटन मंत्री मनोहर आजगांवकार हांणी फातोड्डेंचे आमदार विजय सरदेसाय हांच्या एका अतारांकीत प्रस्नाक दिल्ले लेखी जापेंत गोवा मायल्सा कडल्यान गोंय सरकाराक सुमार 2.5 कोटी जीएसटी येणावळ आयल्या अशें नमूद केलां. आतां वेलेन्सियो रॉड्रिगीस हांणी दिल्ले म्हायती प्रमाण ही येणावळ सरकारी तिजोरेंत जमा जावंक ना हे स्पष्ट जाला. फाटल्या विधानसभा अधिवेशना वेळार कुंकळ्ळीचे आमदार युरी आलेमांव हांणी विचारिल्ल्या प्रस्नाक पर्यटन मंत्री रोहन खंवटे हांणी दिल्ले जापेंत सुमार 3.34 कोटी रुपया जीएसटी वसूल केला, अशें म्हणलां. ह्या दोनूय जापेंत सरकारान फटीची म्हायती दिल्ल्याचें आता स्पश्ट जाला.
जीएसटी वसूल करपाचें काम पर्यटन खात्याचे न्हय
गोवा मायल्स एप टॅक्सी सेवा पर्यटन खात्या कडल्यान चलता पूण हे कंपनीन जीएसटी फारीक करूंक ना जाल्यार ताका पर्यटन खातें जापसालदार ना, अशें गोंय पर्यटन खात्याचे वेवस्थापकीय संचालक निखील देसाय हांणी म्हणलां. गोवा मायल्स कंपनीन दिल्ले म्हायती वयल्यान पर्यटन खात्यान ही जाप विधानसभेंत दिल्या. जीएसटी वसूल करपाचो अधिकार जीएसटी आयुक्तांचो अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
