भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंयकारांक नोकरेंत, उदरगत तशेंच हेर मळांनी प्राधान्य मेळपाक जाय हाका म्हजो पुराय तेंको आसा. मात कांय जाण गोंय फकत गोंयकारांक खातीरूच म्हणटात, ते संकल्पनेक म्हजो विरोध आसा अशें राज्याचे राज्यपाल पी एस श्रीधरन पिल्लय हांणी स्पश्ट केलां. जायत्या गजालींत गोंयकारांक प्राधान्य दिवपाक जाय अशें म्हजेंय मत आसा. गोंय फकत गोंयकारांकूच अशें म्हणप समा न्हय. तशें जावपाक शकना अशें तांणी सोमाराक सान्तआंद्रे मतदारसंघाचे भोंवडे वेळार बाती हांगा लोकां सामकार उलयतना सांगलें.
सान्तआंद्रेचो आमदार विरेश बोरकार हांचो रिव्होल्शुनरी गोवन्स पक्ष गोंयकारांच्या हक्का खातीर झुजता ते फांटभुंयेर राज्यपालान जें कितें सांगलां ते म्हत्वाचें आसा. सान्तआंद्रे वाठारांतलो लोक विदेशांत वचून थंय स्थाईक जातात, ताका लागून थळावे लोक उणे जायत चल्ल्यात अशी म्हायती म्हाका आमदार विरेश बोरकार हांचे कडल्यान मेळ्ळ्या. थळावो लोक हांगाच रावन गोंयचे उदरगतीक हात लायतले हे खातीर बोरकार हांणी फुडाकार घेवपाक जाय. ताकां ते खातीर सहकार्य करपाची म्हजी तयारी आसा अशें राज्यपालान सांगलें. हो म्हयनो सोपमेरेन गोंयांतल्या सगळ्या गांवांनी पावपी हांव पयलो राज्यपाल जातलों अशेंय तांणी सांगलें.
राज्यपाल म्हणून काम सुरू रतना डायलेसिसा खातीर 71 दुयेंतीक अर्थीक मजत करपाचें हांवें थारायल्लें. मात सरकार, आमदार हांच्या सहकार्याक लागून हांव सगळ्या गांवांनी पावलो तशेंच आतां मेरेन 710 जाणांक डायलेसिसा खातीर मजत दिवपाक शकलो अशें तांणी सांगलें. गोंयांत एक हजार वर्सांची वडाचीं झाडां आसात अशी म्हायती म्हाका मेळ्ळ्या. वडाक दायज झाड म्हणून जाहीर करतले अशी म्हायती तांणी दिली.
राज्यपालान कुडका हांगचे इतिहासीक सान्तान चर्चीत भेट दिली. पिलार म्युझियमाक भेट दिल्या उपरांत बातीं हांगा सान्तआंद्रे मतदारसंघांतल्या सात पंचायतीचे सरपंच आनी पंचा कडेन तांणी संवाद सादलो.
गोंय फकत गोंयकारांक अशें सांगलें ना
गोंय फकत गोंयकारांचे जावपाक शकना अशें राज्यपाल श्रीधरन पिल्लय हांच्या म्हणलां ताचेर प्रतिक्रिया दितना आरजी गोंय फकत गोंयकरांक अशें केन्नाच म्हणले वा सांगलें ना अशें आमदार विरेश बोरकार हांणी सांगलें. आमचो पक्ष गोंयकारांची वळख, संस्कृती राखून दवोरपा खातीर तसेंच गोंयकारांक तांचे हक्क मेळचे हे खातीर वावुरता अशें तांणी स्पश्ट केलें.
सगळ्या मळांनी गोयकारांक प्राधान्य मेळचें असो आमचो आग्रो आसा. राज्यपालाकूय तें आतां पटलां . राज्यांत संद नाशिल्ल्यान, नोकऱ्यो गोंयां भायल्यांक मेळटात देखून गोंयकारांक विदेशांत वच्चे पडटा. स्थलांतरींतांक आमचो विरोध ना आमचो विरोधा आसा ते करतात ते बेकायदेशीरपणाक. कोमुनिदादचे जमनीचेर ते घरां बांदतात. ताका लागून राज्यांत झोडपट्ट्यो तयार जाल्यात अशें बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
