भांगरभूंय | प्रतिनिधी
पणजीः गोंयांतलो पर्यटन पावसाळी पर्यटन नेटान चालू आसा. शेनवारा आनी आयतारा ह्या सुटयेच्या दिसांनी पर्यटक अजुनूय गोंयांत व्हड प्रमाणांत येतात. आयतारा दीसभर गोंयांतल्या सगळ्याच पर्यटन थळांचेर पर्यटकांची गर्दी आशिल्ली. पोरणें गोंयची चर्च पळोवपाक आयतारा व्हड प्रमाणांत पर्यटकांनी हाजेरी लायिल्ली.
कांय वर्सां आदीं जून ते ऑक्टोबर ह्या पांच म्हयन्यांत गोंयांतलो पर्यटन मोसम बंद आसतलो. पर्यटक पावसाळ्यांत गोंयांत उण्या प्रमाणांत येताले. पूण आतां वर्सूयभर पर्यटक व्हड प्रमाणांत गोंयांत येतात. ताका लागून गोंय हें पर्यटकांचें बाराय म्हयने पर्यटनाचें थळ जालां. हेच खातीर सध्या गोंयांत देशी पर्यटकांची व्हड प्रमाणांत गर्दी पळोवपाक मेळटा.
फाटलीं दोन वर्सां कोरोना म्हामारीक लागून गोंयांत पर्यटकांचो आंकडो उणो जाल्लो. पूण आतां कोरोना म्हामारीचो संसर्ग उणो जाल्ल्यान पर्यटकांची संख्या वाडल्या. ह्या पर्यटकां मदीं विदेसी पर्यटकां परस देशी पर्यटकांचो आंकडो चड आसा. गोंयांत पावसाळो चालू आसून लेगीत महाराष्ट्र, कर्नाटक, गुजरात, दिल्ली सारकिल्ल्या राज्यांतले पर्यटक गोंयांत येतात. सध्या गोंयांतल्या दर्यादेगेंचेर पर्यटकांची गर्दी दिसताच ते प्रमाण चर्ची, देवळां, किल्ले, कॅसिनो तशेंच हेर पर्यटन थळांचेर पर्यटक भेटी दितात. गोंयांतली फार्महावसां पर्यटकांनी भरून गेल्यांत. आदीं पर्यटनाचेर आदारीत वेवसाय पावसाळ्यांत बंद आसताले, पूण सध्या खूबशे दुकानकार, टॅक्सी धनी हांचो वेवसाय तेजीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
