काजूवाडो- मोरपिर्ला शाळा इमारतीची आमदार एल्टन डिसोझान केली पळोवणी

भांगरभूंय | प्रतिनिधी

भांगरभूंय । प्रतिनिधी
केंपेंः केंपें मतदारसंघांतल्या मोरपिर्ला हांगच्या काजूवाडो प्राथमीक शाळा इमारतीची अवतिकाय जाल्ल्यान आमदार एल्टन डिकॉस्ता हांणी तिची पळोवणी केली. विद्यार्थ्यांक बसपाक धड बांक नात तशेंच खेळपाक लेगीत जाय तशी सुवात ना हें तांकां दिसून आयलें. हे शाळेंत शिक्षण घेवपी एसटी समाजांतल्या भुरग्यांक बरे भशेन शिक्षण घेवपाक मेळना हें पळोवन वायट दिसता अशें तांणी पत्रकारां कडेन उलयतना सांगलें.
काजूवाडो शाळेचे स्थितीची म्हायती मेळटगीर आमदार डिकॉस्ता हांणी मोरपिर्लाची सरपंच आश्विनी गांवकार, पंच वांगडी नितेश गांवकार, संगीता गांवकार हांचे वांगडा तिची पळोवणी केली. सरकारान गांवगिऱ्या वाठारांतल्या सगल्या प्राथमीक शाळा इमारतींची पळोवणी करून थंय ना त्यो सुविधा मेळोवन दिवपाक जाय. आपणे विधानसभेंत हो मुद्दो उपस्थीत केल्लो. एसटी समाजांतल्या लोकांक चालीक लायिल्ल्यो येवजण्यो, निधी हाचो लाब मेळचो हे खातीर आपले यत्न चल्ल्यांत अशें डिकॉस्ता हांणी सांगलें.
आमदार एल्टन डिकॉस्ता शाळा तशेंच गांवांतल्या लोकांच्यो समस्या सुटाव्यो करपा खातीर वावुरतात. काजूवाडो शाळेची स्थिती सुदारपा खातीर ते यत्न करतले अशें सरपंच आश्विनी गांवकारान सांगलें.