भांगरभूंय | प्रतिनिधी
पणजीः कदंब येरादारी म्हामंडळान आपल्या बसस्टॅण्डांचेर आशिल्लीं दुकानां भाड्याक दिवपा खातीर निविदा काडल्यात. फक्त पेडणें सोडून हेर सगळ्या बसस्टॅण्डां वयल्या दाकनांची पावणी जातली. हे खातीर म्हामंडळान पावणे खातीर अर्ज मागयल्यात.
गोंयभरच्या कदंब बसस्टॅण्डा वयलीं दुकानां भाड्याक दिवपा खातीर कदंब येरादारी म्हामंडळान निविदा काडल्यात. दर दुकानाचो आकार, निविदे संबंदांतलें वेळापत्रक हाची म्हायती 8 मेक कदंब येरादारी म्हामंडळाचे वॅबसायटीचेर उपलब्ध आसतली. ही निविदा स्विकारप वा भायर मारप हाचे सगळे अधिकार कदंब वेवस्थापकी संचालका कडेन आसतले, अशी कळोवणी कदंब म्हामंडळान काडल्या.
कदंब येरादारी म्हामंडळाच्या वरिश्ठ अधिकाऱ्यान हे विशीं म्हायती दितना सांगलें, हे निविदेंत कदंब बसस्टॅण्डा वयलीं दुकानां तशेंच कॅण्टीन भाड्याक दिवपाचो आस्पाव आसा.
ह्या आस्थापनाची निविदा दिवपा खातीर म्हामंडळ पावणी करतलें. जो सगळ्यांत चड बोली लायतलो ताका हीं आस्थापनां चलोवपा खातीर मेळटलीं. आमी ह्या आस्थापनांची वळेरी जारी करून दुकानांक वा कॅण्टीनाक नंबर दितले. इत्सुकांनी त्या नंबराचेर आपली बोली लावची. तांची बोलीची रक्कम सील बंद पेटुलांत दवरतले, अशें अधिकाऱ्यान सांगलें.
ह्या आस्थापना खातीर उण्यांत उणीं रक्कम निश्चीत करूंक ना. जर आमी एक उणी रक्कम निश्चीत करीत जाल्यार बोलींत खूब उणी रक्कम लायतात. ते खातीर आमी पावणेक अर्जदारांक तांकां जाय ते रकमेची बोली लावपाक मेकळीक दिल्या. अशें करीत जाल्यार चडांत चड रक्कम येतली अशी आमकां आस्त आसा, अशी म्हायती अधिकाऱ्यान दिली. पणजी, म्हापशें, मडगांव ह्या मुखेल बसस्टॅण्डा सयत सगळ्या ल्हान बसस्टॅण्डार आशिल्ल्या दुकानांची पावणी जातली. फक्त पेडणें बसस्टॅण्डा वयल्या दुकानांची पावणी जावची ना. ह्या बसस्टॅण्डा वयल्या दुकानांक अजून मेरेन वेवसायीक लायटीची जोडणी मेळूंक ना, हे खातीर ह्या दुकानांची पावणी आमकां करपाक मेळना, अशेंय अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
