भांगरभूंय | प्रतिनिधी
अॅडव्होकेट जनरल पांगम हांची खंडपिठांत म्हायती
भांगरभूंय I प्रतिनिधी
पणजी : राज्यांतल्या रस्त्यांचे कुशीक वा हेर सुवातेर उबारपी होर्डिंग्जांचेर नियंत्रण हाडपाक तशेंच बेकायदो प्रकारांचेर आळाबंद हाडपाक राज्य सरकारान महसूल सचिवांच्या अध्यक्षते खाला 15 जाणांची उच्च पांवड्या वयली समिती स्थापन केल्या. ते भायर बेकायदो उबारिल्ल्या होर्डिंग्जांचेर कारवाय करपाचे निर्देश दोनूय जिल्होधिकाऱ्यांक दिल्ल्याची म्हायती अॅडव्होकेट जनरल देविदास पांगम हांणी मुंबय उच्च न्यायालयाच्या गोंय खंडपिठांत दिली.
राज्यांतल्या रस्त्यांचे कुशीक वा हेर सुवातेर व्हड व्हड हाेर्डिंग्ज उबारल्यात. ह्या होर्डिंग्जा खातीर खासा यंत्रणा नाशिल्ल्यान संबंदीत खंयूय होर्डींग्ज उबारतात. हाका अाळाबंद हाडपाक खंडपिठान 2007त स्वेच्छा दखल याचिका घेतिल्ली. हातूंत अखील गोंय होर्डिंग्ज धनी संघटणा, राज्य सरकार, नगरपालिका संचालनालय, म्हामार्ग प्रशासन, राष्ट्रीय म्हामार्ग प्राधिकरण आनी केंद्र सरकाराक प्रतिवादी केला.
ह्या प्रकरणांत खंडपिठाक मजत करपाक ज्येश्ठ वकील एस. डी. लोटलीकार हांची अॅमिकस क्युरी म्हूण नेमणूक केल्या. ह्या प्रकरणांत खंडपिठान वेळावेळार निर्देश जारी केल्ले. हाची दखल घेवन राज्य सरकारान महसूल सचिवांच्या अध्यक्षते खाला 15 जाणांची उच्च पांवड्या वयली समिती स्थापन केल्या.
ह्या प्रकरणाची फुडली सुनावणी 13 जानेवारी 2023 दिसा दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
