भांगरभूंय | प्रतिनिधी
पुलीस काॅन्स्टेबलाक आक्ताक मरण
भांगरभूंय। प्रतिनिधी
म्हापशें : मांडवी न्हंये वयल्या अटल सेतूचेर काल सांजवेळा सवाय स वरांचेर मोटारीन उरफाटें दिशेन वचून म्हाल व्हरपी ट्रकाक नेटाचो धपको दिल्ल्यान संदीप नायक उर्फ केयश मडकयकार (32, बामणभाट- मेरशी) ह्या पुलीस काॅन्स्टेबलाक आक्ताक मरण आयलें. धपक्या वांगडा मोटार चलोवपी संदीप दावे वटेनच्या जनेलांतल्यान उसळून भायर पडलो. हाचे वयल्यान अपघात कितलो भिरांकूळ तें कळटा. ट्रक दावे वटेनच्या पुलाच्या कठड्याक आदळ्ळो. ह्या नव्या पुला वयलो हो पयलो अपघात.
हणजुण्यां पुलीस स्टेशना कडेन संबंदीत संदीप जीए 07 ई 7729 क्रमांकाचे स्विफ्ट मोटारीन मेरशें घरा वतालो. पुलाचेर गाडये वयलें नियंत्रण गेल्ल्यान ती दुभाजकाचेर आदळ्ळी आनी उरफाटें दिशेन पडली. तेन्नाच जीए 03 एन 7869 क्रमांकाचो ट्रक येतालो. ताका आपटून मोटार परत दुभाजकाचेर वचून उबी जाली.
त्या धपक्यान संदीप मोटारीच्या दावे वटेनच्या दाराच्या जनेलांतल्यान रस्त्यार पडलो आनी आक्ताक गेलो. ट्रक चालक धीरजकुमार ठाकूर (रा. करासवाडा, मूळ बिहार) हाचो पांय मोडला. तो करासवाडा उद्देगीक वसणुकेंत वतालो. संदीप हांची कूड गोमॅकाँत पोस्ट मार्टेमाक व्हेलां.
आयतारा दनपरां ताचेर निमणे संस्कार जातले. पंचनामो उपनिरीक्षक प्रती प्रभू भट आनी हवालदार प्रितम दाभोळकार हांणी केलो. संदीप हो सांताक्रूज भाजपा मंडळाच्या उपाध्यक्षाचो चलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.