भांगरभूंय | प्रतिनिधी
गोंय पाचव्याचार सैमान नटलां. वेगळ्यो वेगळ्यो वनस्पत, रानवटी फुलां-फळांनी सैम भरुन आयलां. अस्तंत घांटांतल्या वनस्पतींच्या विंगड विंगड प्रकारांत कारवी वनस्पतीक मुखेल सुवात आसा. ह्या रानांत पांच तरेच्यो कारवी जाती मेळटात. तांतूत सात वर्सां उपरांत फुलपी कारवीक म्हत्वाची सुवात आसा. सात वर्सां फुल्ल्या उपरांत तांकां बियो तयार जातात आनी उपरांत वनस्पत मरता. ते उपरांत दुसऱ्या वर्सा सावन बियांतल्यान परतून कारावीचें बीं तयार जाता आनी सात वर्सांनी तें परतून फुलता. ताच्या पानांनी अस्तंत घांटांतलीं फुलपाखीं, सुकणीं, म्होंवा मूस आनी किडे रावतात.
आठ वर्सां उपरांत अंदूं चोर्ला घांटांत कारवी फुल्ल्या. निमाणे खेपे 2016 वर्सा फुलिल्ली. सात वर्सां उपरांत फुलपी कारवी फाटल्या वर्सा 2023 वर्सा फुलतली अशीं अपेक्षा पर्यावरण मोगींक आशिल्ली. पूण हवामान बदलाक लागून ती सात वर्सां पुराय जातकच अंदूं आठव्या वर्सा फुल्ली.
https://www.facebook.com/bhaangarbhui/videos/541889425035818
सद्या चोर्ला घांटाच्या चरावणे, हिवरे आनी गोंय – कर्नाटक शिमेवयल्या वाठारांनी तशेंच चोर्ला घाटांतल्या रानांत कारवी पळोवपाक मेळटली.
केरी- सत्तरीतलो विवेकानंद पर्यावरण जागृताय फौज हांणी ‘कारवी पुष्पोत्सव’ आयोजीत केल्लो. चलात तर ह्या व्हिडियो वरवीं जाणून घेवया ज्येश्ठ पर्यावरणशास्त्रज्ञ राजेंद्र केरकार, वनस्पतशास्त्रज्ञ आनी हरमलच्या गणपत पार्सेकर महाविद्यालयाची सहाय्यक प्राध्यापक अक्षत्रा फर्नांडीस हांणी दिल्ली कारवी फुलांची म्हायती.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
