भांगरभूंय | प्रतिनिधी
ऑनलायन बेटिंगाचो मास्टरमायंड बाबू खेमानीक अटक
रायपूर/पणजीः रायपूर गुन्यांव फांट्यान गोंय कडेन संबंद आशिल्ल्या आंतरराज्य ऑनलायन क्रिकेट बेटिंग रॅकेट उक्ताडार हाडले. हे कारवायेंत पुलिसांनी गोंयच्यान 4 आरोपींक अटक केल्या, जे थंय बसून बेटिंगाचो पॅनल चलयताले. ‘महादेव सट्टा सिंडिकेट’ च्या प्रमोटरां वरवीं चलयल्ल्या रेड्डी अन्ना आनी FBBET77 ह्या 21 बेटिंग ॲपांचें नेटवर्क गोंयांतल्यान पातळ्ळें.
छत्तीसगडांतल्या बेकार तरणाट्यांक म्हयन्याक 30 ते 40 हजार रुपया पगार दिवपाचें उतर दिवन गोंयांतल्या वेगवेगळ्या सुवातींनी तांकां दवरून पेमेंट गेट-वे आनी बेटिंग पॅनल चलयताले. हे कारवायेंत पुलिसांनी लॅपटॉप, मोबायल फोन आनी कोटीच्या वेव्हाराची कागदपत्रां जप्त केल्यात. आरोपी आपली वळख लिपोवपा खातीर चीनी सॉफ्टवेअर वापरून सुवाती बदलताले अशें चवकशेंतल्यान कळ्ळां.
ह्या प्रकरणांतलो मुखेल मास्टरमायंड बाबू उर्फ गुलशन खेमानी हाका मुंबयच्यान अटक केली. ताच्या सिंडिकेटाचे मुखेल केंद्र गोंय, मुंबय आनी पुणे आशिल्ले. गोंयच्यान लक्ष्मण ढ़ोबर, आशीष जाधव, रंजीत कुमार आनी वैभव खंडेलवाल हांकां अटक केल्या. हे आरोपी महादेव ॲपाच्या धर्तीचेर ‘3 STUMPS’ नांवाची वेबसायट चलयताले. विशेश म्हळ्यार गोंयांतल्या ह्या केंद्रांतल्यान फकत बेटिंग चलताली अशें न्हय, तर ताची रक्कम डिजिटल चलनांत (बिटकॉयन) रुपांतरीत करून श्रीलंका आनी चीन ह्या सारक्या देशांक धाडटाले.
चवकशे वेळार, बाबू खेमानी आपूण सोशल मिडिया इन्फ्लुएन्सर म्हूण सांगतालो. इंस्टाग्राम आनी युट्युबावेली आपली लोकप्रियता वापरून तो प्रभावी लोकांक आनी व्हड वेवसायीकांक आपल्या जाळ्यांत ओडतालो. आयपीएल मॅचीं वेळार ‘प्रेडिक्शन’ आनी ‘टिप्स’ दिवपाच्या नांवान तो लोकांक टेलिग्राम लिंकां कडेन जोडटालो आनी थंयच्यान तांकां बेटिंग प्रकरणांत हाडटालो. खेमानीन आपली वळख एक सेलिब्रिटी सारकी केल्ली, जाका लागून लोक ताचेर सहजपणान विस्वास दवरताले. लक्झरी गाडयो, परदेश भोंवडी आनी आलिशान पार्ट्यो हांचीं चित्रां घालून तो एक येसस्वी वेवसायीक म्हूण आपली खोटी प्रतिमा तयार करतालो. हे प्रतिमेच्या बळग्यार ताणें रायपूरांतल्या रविभवनांतल्या जायत्या व्हड मोबायल आनी कव्हर वेवसायिकांक बेटिंग सिंडिकेटांत आस्पावन घेतिल्ले.
महादेव सिंडिकेट खाला जायते ऑनलायन बेटिंग पॅनल सक्रीय आसात, तातूंत रेड्डी अन्ना, रेड्डी क्लब, FBBET77, CBFTE ऑनलायन बुक, बेटभाई बुक, फेयरप्ले, सुपरविन, विनबज, जन्नत बुक, महाकाल बुक, राजवीर ऑनलायन बुक, लोटस 365, लेजर बुक, कोहनूर बुक, अलीबाबा बुक, खेलोयार, एसडी बुक, लायन बुक, स्काय एक्सचेंज आनी डायमंडएक्स डॉट कॉम हांचो आस्पाव जाता. पुलीस अधिकाऱ्यांच्या म्हणण्या प्रमाण, ह्या सगळ्या पॅनलांचो वापर एकाच व्हडल्या नेटवर्का वरवीं बेकायदेशीर जुगार चलोवपा खातीर जाता आनी ह्या माध्यमांतल्यान व्हड प्रमाणांत अर्थीक फटवणूक जाता.
ह्या सिंडिकेटाची काम करपाची पद्दत खूब संघटीत आनी क्रूर आशिल्ली. खेमानीन ह्या बेटिंगाचे पयशे वसूल करपा खातीर गुंडांचो वेगळो पंगड तयार केल्लो. पयशे दिवपाक न्हयकार दिवपी लोकांक भंय घालून सोशल मिडिया वरवीं तांची बदनामी करपाची धमकी दितालो. कांय प्रकरणांनी बेटिंगाच्या पयशांच्या बदलाक लोकां कडल्यान भांगराच्यो वस्ती जबरदस्तीन घेतालो अशी म्हायती उजवाडाक आयल्या. ह्या वेव्हारां खातीर ‘म्युल’ खातीं (हेरांच्या नांवान आशिल्ली खातीं) वापरताले, देखून तपास एजन्सींक पयशांचो सोद घेवप कठीण जातालें. फाटलीं अडेज वर्सां हें सिंडिकॅट रेड्डी ग्रुप, बजरंग ग्रुप, डायमंड मास्टर ह्या ऑनलायन पॅनलांतल्यान कोटी रुपयांची उलाढाल करताले.
मजगतीं, 2026 वर्सा कमिशनर पद्दत चालीक लायल्या उपरांत रायपूरांत ऑनलायन बेटिंगाचेर केल्ली ही 11वी व्हडली कारवाय. आतां मेरेन 70 परस चड आरोपींक अटक केल्या आनी तांचे कडल्यान बीएमडब्ल्यू गाडी सयत सुमार 3 कोटी रुपयांची मालमत्ता जप्त केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
