भांगरभूंय | प्रतिनिधी
भांगरभूंय । प्रतिनिधी
पेडणें : चांदेल उदका प्रकल्पा (Chandel Water Project) खातीर जमनी दिवन 25 वर्सांचो काळ सोंपलो. तरीय आजून मेरेन कसलोच मोबदलो वा कुटुंबांतल्या कोणाकूच सरकारी नोकरी मेळिल्ली ना. ‘निदान आतां तरी आमकां न्याय दिवचो’, अशी मागणी करीत प्रकल्पग्रस्तांनी मंत्री सुभाष फळदेसाय हांची भेट घेतली. तांची गाराणी आयकून मंत्री सुभाष फळदेसाय हांणी आठ दिसां उपरांत सरकारा कडे जोड बसका घेवन जुनाच्या पयल्या सप्तकांत हो प्रश्न सोडयतलो, अशें आस्वासन दिलें.
ते चांदेलाच्या अतिरिक्त उदका प्रकल्पाच्या उक्तावण सुवाळ्याक आयिल्ले.
जमीनदार बाबुराव गाड हांणी सांगलें की, जमनी दिवन पसून कसलोच मोबदलो मेळिल्लो ना. आमी मंत्री आनी मुख्यमंत्र्यांची भेट घेवन चर्चा केली, पूण फकत आश्वासनांच मेळ्ळीं. निदान आतां तरी मोबदलो आनी कुटुंबांतल्या वांगड्याक सरकारी नोकरी दिवची.
फाटीं बांदकाम खात्याचे मंत्री निलेश काब्राल आयिल्ले, तेन्ना तांच्या मुखारय आमी प्रश्न दवरिल्ले. तांणी आठ दिसां भितर प्रश्न सोडोवपाचें उतर दिल्लें, पूण मुखार कांयच जावंक ना. आतां परतून मंत्री आयले, उक्तावण करून गेले जाल्यार आमचो प्रश्न तसोच उरतलो, देखून आमी मंत्री सुभाष फळदेसाय हांची भेट घेतली. ते आमच्यो मागण्यो पूर्ण करतले हाची आमकां खात्री आसा.
जुनाच्या पयल्या सप्तकांत तोडगो
मंत्री फळदेसाय हांणी सांगलें की, आमी आठ दिसां उपरांत सरकारा कडे बसका घेवन हाचेर योग्य तो मार्ग काडटले. जांच्यो जमनी गेल्यात तांणी व्हड त्याग केला देखून हो प्रकल्प उबो रावला. पेडणेच्या लोकांक उदक मेळटा. जुनाच्या पयल्या सप्तकांत हो प्रस्न सदां खातीर सोडतलों, अशें उतर मंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
