भांगरभूंय | प्रतिनिधी
पणजी: शॉपिंगाच्या निमतान 2022त पणजे शारांतल्या एका मॉला कुशीक आशिल्ल्या लॉजांत व्हरून 17 वर्सा पिरायेचे चलयेचेर लैंगीक अत्याचार केल्लो. ह्या प्रकरणांतले पिडीत चलयेची कसलीच सुलूस लागूंक नाशिल्ल्यान तिका न्यायालयांत हजर करपाक अपेस आयलें, अशें निरिक्षण नोंद करून दुबावीत सुजन सुनील तालुकदार (38, मूळ अस्तंत बंगाल) ह्या दुबाविताक पॉक्सो न्यायालयान पुरावो नाशिल्ल्यान निर्दोश सुटका केली. हे विशींचो आदेश न्या. पुजा कवळेंकार हांणी दिलो.
ह्या प्रकरणांत पिडीत चलयेच्या सोयऱ्यांनी 27 जून 2022 दिसा पणजी पुलीस स्टेशनार कागाळ दाखल केली. तेप्रमाण, पिडीत चली 10 दीस पयलीं गोंयांत आयिल्ली. ह्या वेळार दुबावितान तिचे कडेन इश्टागत केली. उपरांत 26 जून 2022 दिसा सांजवेळा 4 ते रातच्या 8 वरां मजगतीं शॉपिंग करपाक या अशें सांगून शारांतल्या एका मॉला कुशीक आशिल्ल्या लॉजांत घेवन गेल्लो. थंय तिचेर लैंगीक अत्याचार केले. तशेंच दुबावितान तिका मारपेट करून वयली घडणूक कोणाकूय सांगत जाल्यार जिवेशी मारपाची धमकी दिल्ली.
कागाळीची दखल घेवन पणजी पुलीस स्टेशनाची उपनिरिक्षक सपना गांवस हांणी दुबावीत सुजन हाचे आड भारतीय दंड संहितेच्या कलम आनी बाल लैंगीक शोशण विरोधी कायदो 2012 (पॉक्सो) कायद्याच्या विवीध कलमां खाला गुन्यांव दाखल करून अटक केल्ली. उपरांत ह्या प्रकरणाचो तपास पुराय जाले उपरांत 19 ऑगस्ट 2022 दिसा दुबाविता आड न्यायालयांत आरोपपत्र दाखल केलें.
न्यायालयान ह्या प्रकरणांतले प्रथमदर्शनी पुराव्याची दखल घेवन दुबावितां आड आरोप निश्चीत करून खटलो सुरू केलो. ह्या प्रकरणांत न्यायालयांत सुनावणी जाली तेन्ना खूबशे फावटी संद दिवन पिडीत चलयेक उरफाटी तपासणी करपा खातीर हजर करूंक नाशिल्ल्यान पिडीत चलयेची न्यायालयांत उरफाटी तपासणी अपेशी थारली अशें निरिक्षण नोंद करून न्यायालयान दुबावीत सुजन सुनील तालुकदार हाची निर्दोश सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
