भांगरभूंय | प्रतिनिधी
संगीत मनाक शांतीकाय दिता. थाकाय दिता. पूण, त्या संगीताचो आवाज नियंत्रणा भितर आसपाक जाय. एक ल्हानशा रुमांत कान फुट्टात त्या आवाजांत डीजे वाजयलो जाल्यार, ताचो परिणाम भलायकेचेर जातलोच. हे खातीर आपणें खंयचे सुवातेर कितलो आवाज दवरप हाचें भान असप गरजेचें. तशेंच कायद्यान घालून दिल्ले नेम पाळप गरजेचें. रातच्या 10 उपरांत शेजरा डीजे वाजलो जाल्यार न्हीद पिड्ड्यार जातली आनी भलायकीय इबाडटलीच. अशा आवाजाच्या प्रदुशणा आड सध्या उत्तर गोंयांतल्या दर्यादेग वांठारांतले लोक आवाज काडपाक लागल्यात. मिनाचो वेवसाय बंद पडिल्ल्याक गोंयची अर्थवेवस्था पर्यटनाचेर निबूंन आसा. पूण पर्यटनाच्या नांवार जर रातभर आवाजाचें प्रदुशण जावंक लागलें जाल्यार लोकांनी ओगी कित्याक बसप?
हालींच अंजुणें, वागातूर ह्या वांठारांतल्या लोकांनी रातचे उसरा मेरेन आवाजाचें प्रदुशण करपी रेस्टोरंटां आनी क्लबां आड मोर्चा काडपाक सुरुवात केल्या. कायदो मोडपी ह्या क्लबवाल्यांक जेन्ना थळावे लोक जाप विचारपाक गेले, तेन्ना पुलीस अधिकाऱ्याक लेगीत तांणी भितर घेतले ना. हाचो अर्थ हे क्लबवाले कितले ‘पावरफुल’ जाल्यात तें कळटा. सरकार ह्या विशयाचेर आडनदर करता आनी तेच खातीर ह्या क्लबवाल्यांचें फावता, असो आरोप थळाव्या लोकांनी केला. ह्या प्रकरणांत सरकाराक कित्याक जबाबदार धरप न्हय? सरकाराक जाय जाल्यार असले प्रकार बंद करूं येतात. पूण तशें जायना. हेच खातीर तिडकल्ल्या लोकांनी सरकाराचेर फोग काडपाक सुरुवात केल्या.
भुरग्यांच्या अधिकारांची राखण करपी आयोगान, पोरुं हो विशय खूब गंभीरतायेन घेतिल्लो आनी संबंदितांक ह्या विशयाचेर पावलां मारपाक सांगिल्लीं. फांतोड मेरेन संगीत वाजता आनी त्या सुमारा भायल्या आवाजान अभ्यास जायना अशी कागाळ खुद्द विद्यार्थ्यांनी आयोगा कडेन केल्ली. इतलें जावनूय हे क्लबवाले खंय थांबल्यात? हाचो अर्थ आमचे पुलीस धरून, प्रशासकीय अधिकारी आपली ड्युटी करपाक नापास थारल्यात. बेकायदेशीर गजालींचेर कारवाय करपाक तांकां धाडस ना वा कसल्या तरी चेपणा खाला ते वावुरतात हें सिद्ध जाता. नाजाल्यार कारवाय कित्याक जायना? लोकांनी कागाळी करूनय जर क्लबवाले आवाज चडोवंक लागले जाल्यार हातूंत कोण कोण सामील आसा हें स्पश्ट जाता.
पर्यटक गोंयांत येतले. मजा करतले आनी वतले. पूण परिणाम आमकां गोंयकारांक भोगचे पडटात. ह्या आवाजाच्या प्रदुशणाक लागून जाण्ट्या लोकांक त्रास जातात आनी तातूंत कोणूय दुयेंती आसलो जाल्यार ताका कितले त्रास जाता आसतले ही चिंतपा सारकी गजाल. पूण हें समजून घेवपाची मानसीकताय आमच्या अधिकाऱ्यां मदीं आनी पुलिसां मदींय ना अशें म्हणल्यार अतिताय थारची ना. अधिकारी कडक रावले जाल्यार कोणाची कापाझदाद जातली रातच्या 10 उपरांत आवाज करपाची? ते नापास थारल्यात म्हूण तर ज्येश्ठ नागरीक, बायलां आनी भुरग्यांक आयज रस्त्यार देंवचें पडटा आनी आपल्याक न्याय मेळोवन घेवचो पडटा. खरें तर ह्या अधिकाऱ्यांक अशें दृश्य पळोवन लज दिसपाक जाय. पूण ती तांणी विकून खाल्ली आसल्यार तांकां चड पडून गेलां!!!
अशे प्रकार घडटकच थंय विरोधी पक्षांचे फुडारी वतात आनी लोकांक तेंको दितात. तातूंत कांयच चूक ना. आपली ड्युटी सारकी करिनात त्या अधिकाऱ्यांचेर मात्सो तरी दबाव तयार जाता, पूण विरोधक थंय पावतकच सरकार म्हणटा हें ‘राजकारण’ चल्लां. राजकारण आसूं वा आनीक कितेंय लोकांच्या जीवीत- मरणाचो जेन्ना प्रस्न येता, तेन्ना सरकारान असो विचार करिनासतना लोकांचो प्रस्न सोडोवंक जाय. नाजाल्यार कित्याक जाय तें सरकार?
बरें, सरकार पक्षांतलेच आमदार जेन्ना अशा गजालीं आड आवाज काडटात, तेन्ना सरकाराचें ताचेर कसलेंच नियंत्रण ना हें सिद्ध जाता. मागीर घरांतल्याच मनशान आवाज काडपाक लागिल्ल्याचें भायर पडटकच, तें आमचें ‘इन्टरनल मॅटर’ म्हणून फाफडून उडोवप समा न्हय. सरकारान अशे तरेचे विशय गंभीरतायेन घेवन ते लोकांची तिडक वाडचे आदींच सुटावे करपाक जाय. हातूंतल्यान तेच लोकांची मनां जिखून फुडली वेंचणूक जिखूंक शकतले, नाजाल्यार लोक आपल्याक जाय तशें पावल मारतले. न्याय मेळोवपाक…
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
