शिक्षण क्षेत्रांतलो वाडटोभ्रश्टाचार आनी वेपारीकरण

भांगरभूंय | प्रतिनिधी

हालींच देशांत गिनिज बुक ऑफ वर्ल्ड रिकॉर्डांत नोंद जावपा सारखो एक विक्रम घडला. अधिकृत नोंदणी करून घेवपा सारको प्रसंग नाशिल्लो. उलट लजेचो आशिल्लो.
NEET परिक्षेंत पयले सुवातीचेर 720 मार्कांतले 720 जोडून 61 विद्यार्थी विराजमान जावप हे जगांतल्या खंयच्याय देशांतल्या खंयच्याय परिक्षेंत आतां मेरेन शक्य जालें नासुये. 7 वर्सांत 15 राज्यांनी देड कोटी विद्यार्थ्यांच्या फुडाराक बाधक 70 पेपर लीक प्रकरणां घडप होवूय एक विंगड विश्व विक्रम थारूंक शकता.
विकास सादून देश प्रगत करपा खातीर देशाचे प्रशासन चलोवपी खऱ्या अर्थान, प्रामाणिकपणान शिकिल्ले आसप गरजेचें. ‘येन केन प्रकारेण’ पदवी संपादन करप हाका शिक्षण म्हणनात. आमच्या देशांतली आतां मेरेनचीं सगळीं सरकारां शिक्षण क्षेत्राचें म्हत्व जाणून ताच्या प्रसारा खातीर धोरणां, उपाय येवजण्यो विशीं वक्तव्यां करतालीं वा करतात खरीं, पूण प्रत्यक्षांत ती चालीक लावपाक गंभीर दिसलीं नात. जगांतले प्रगत देश आपले जीडीपीचे 6 ते 7% टक्के शिक्षणा खातीर बजेटांत राखून दवरतात तेन्ना आमच्या देशांत ती सरासरी 3% घरांत आसता.
भ्रश्टाचाराचो भस्मासूर शिक्षण संस्थांनी घर करून बसला. ‘विद्या विनयेन शोभते’ आता ग्रंथा पुरतें उरलां. आयज विनय, विवेक, प्रामाणिकपणा विद्या अर्जन करपी विद्यार्थ्यांत उरले ना आनी विद्या दानाक पवित्र मानपी गुरूजनूय उरले नात. शिक्षण क्षेत्रांत दुडवांचो नग्न नाच चल्ला. खाजगी क्षेत्रांतल्या कॉलेज, विश्व विद्यालयांत देणग्यो घेवन प्रवेश, पदव्यो विकपाची परंपरा सुरू आशिल्लीच. उपरांत प्रवेश परिक्षांची तयारी करून घेवपी, करोडोंचो खेळ करपी ‘कोचींग कारखाने’ सुरू जाले. लाखांनी दुडू खर्च केल्ल्यो कोचींग अकादमीच्यो जायराती टॉपरांच्या फोटवां सयत छापिल्ल्यो, महामार्गा बाजूक फलकांचेर लायिल्ल्यो दिसपाक लागल्यो. तरीय पेपर लिक करून आनीक थोडे लाख कमोवपाचो सुवार्थ सुटलोना अशें दिसता. NEET भ्रश्टाचार उक्तडार पडले उपरांत NET परिक्षा मुखार धुकलून थंयच्या संभाव्य भ्रश्टाचाराचेर पांगरूण घाले आसूंये अशें दिसता.
देशांतल्या मुखेल, भोवमानेस्त शिक्षण संस्थांतले प्रवेश परिक्षेचे पेपर लीक करून तांची विक्री जावपाक लागता तेन्ना जगांत त्या संस्थांची पत जागतिक वर्गवारींत खालावता शिवाय देशाच्या शिक्षण क्षेत्राबाबत नकारात्मक संदेश जगांत वता.
NEET ही देशांतली खर स्पर्धात्मक प्रवेश परिक्षा. NEET चे पेपर लीक करपी क्लासवाले, राजकारणी, गूंड चांडाळ-चौकडी आनी ते विकते घेवपी मूठभर अविवेकी विद्यार्थ्यांक लागून परिक्षा दिवपी 21 लाख विद्यार्थ्यांच्या फुडाराचेर घोर अन्याय जाला. खर प्रतिस्पर्धेंत फकत एक मार्क भवितव्य घडोवंक वा इबाडूंक शकता.
NEET पेपर लीक प्रकरणांत दुडू जोडपा खातीर घुसपल्ल्यांची धरपकड सद्या चालू आसा. फुडारांत कोर्टान परिक्षा परतून घेवपाक लायली आनी गुन्यांवकारांक ख्यास्त दिली तरी लाखांनी रुपयांत पेपर विकतो घेवन वयले क्रमांक मेळोवपी गिरेस्त बापायचे नालायक पुतांच्या करण्यांक लागून दिस-रात एकठांय करून प्रामाणिकपणान परिक्षा दिल्ल्या विद्यार्थ्यांच्या मानसीक पीडांची आनी आर्थिक लुकसणांची भरपाय जावप कुस्तार. असले गुन्यांव प्रामाणिक विद्यार्थी तशेंच तांच्या पालकांचे कश्ट,आशा- आकांक्षा आनी सपनां मातयेभरवण करतात.
आदल्या तेंपार शिकवणी- ट्यूशन घेवपी विद्यार्थी शिकपाक फाटी, फ्राक अशें मानताले आनी ही गजाल विद्यार्थी आनी घरांतले समाज, सोयऱ्यां पसून लिपयताले. ट्यूशनाचेर कसलोच खर्च करिनासतना विद्यार्थ्यांनी वैजकी, तांत्रिक शिक्षणां घेतलीं. गोयांत इंटर परिक्षेंत 55% मार्क घेवन वेटींग लिश्टार प्रवेश मेळोवन जाल्ल्या दोतोरांनी समाजांत बरी सेवा दिवन नामना जोडल्या. दुडवांच्या आशेन गुन्यांवकाराच्या रगताची सँपलां बदलपा सारकीं फटींगपणा केली नात, जी हालीं पुण्यांत घडल्यांत. तसलीं कामां NEET पेपर विकतो घेवन दोतोर जाल्ले फटींग करतले. 45% पुण्यायेचेर प्रवेश मेळोवन इंजिनीयर जाल्ल्यांनी ‘स्मार्ट’ अशे पूल, रस्ते, इमारती जरी बांदल्यो ना तरी रस्त्यांचेर डांबर वेवस्थित अपुरबायेन पातळायलो – शेणा भशेन थापलो ना. पावसाचे भान दवरत उदकाक वाट दवरली. पुलाच्या बांदकामाक वर्साभीतर वेरो गेल्यो नात. इमारतींचें छप्पर वर्सा भितर गळ्ळें ना- कोसळ्ळें ना. पेपर विकत घेवपी, बनावट पदवीधर नोकरेक लागले उपरांत ‘तो खर्च’ वसूल करपा खातीर सुरवेच्यान लाच घेवपाक सुरू करतात आनी परिणामी कार्यक्षेत्र भ्रश्टाचारांत लिप्त जाता.
राजकारण्यांची स्वताची बनावट पदवी प्रकरणां आसात. बनावट पदवीधर राजकारणी, आमदार, खासदार, मंत्र्यांची विश्वविद्यालयांत नाशिल्ल्या विशयांतली पदवी सांपडप, कंप्यूटर देशांत येवचे आदी ती डिग्री संगणक फाँटांनी छापिल्ली आसप, सर्टीफिकेटांत चुकीचें स्पेलिंग सांपडप ह्या सारखी फटींगपणा उक्ती पडल्यांत. अमूक राजकारणी आपलो वर्गमित्र आशिल्लो हे अभिमानान सांगपीय मुखार येनात.
हालीं मध्यप्रदेशांतल्या एका कार्यक्रमांत ‘बेटी बचाओ -बेटी पढाओ’ हे फळ्याचेर बरोवपाचो प्रसंग केंद्रीय महिला आनी बालकल्याण राज्यमंत्री सावित्री ठाकूर हिचेर आयलो तेन्ना तिणें बरयले ‘बेढी पडाओ, बच्चाव’. आपूण 12 वी पास अशें सोपूतपत्र तिणें वेंचणुके वेळार दिलां. देशाची अर्थवेवस्था 5 ट्रील्यन डॉलर करतले म्हणपा बदला 5 ‘मेट्रीक टन’ करतले म्हणपी मंत्री आसात. तेन्ना तांच्यो पदव्यो बनावट आसतल्यो हो दुबाव बळावता. बिहारच्या एका राजकारण्याची धूव बोर्ड परिक्षेंत पयली आयली. तो मेरेनच्या तिच्या शाळेंतल्या कारकिर्दींत ती दर वर्सा पास जावपाक खर्शेताली हे लोकांक खबर आशिल्ल्यान बोवाळ जालो. टिव्ही एंकर तिच्या घरा पावले. तांणी तिका कबीर, विवेकानंद, रवींद्रनाथ टॅगोर हांचे बद्दल प्रस्न विचारले तेन्ना गोंदळून बेजार जावन तिणें खरें तें सांगून उडयलें.- “आपणे बापायक फकत आपल्याक पास करपाक सांगिल्लें ताणें तर आपल्याक बोर्डांत पयल्या नंबराचेर हाडलें.”
देशांत प्रत्येक क्षेत्रांत उच्च शिक्षणाची गरज आसता. मात राजकारण हाका आडवाद. शिक्षणीक कोर्सांच्या प्रवेशा खातीर तशेच पदवीधर जाले उपरांत नोकरे खातीर सामान्यांक लिखित परिक्षा, मुलाखती दिवच्यो पडटात. पी.एच.डी पदवीधरांक एक वर्स काँट्रेक्टाचेर प्राध्यापकी मेळोवपा खातीर दर वर्सा सरासरी 5 ते 6 मुलाखती दिवच्यो पडटात. एक रकम मासीक पगार तितलो मेळटा. पगार वाडाय, भविश्य निधी, भलायकी खर्च, पेन्शन हांचो विचार थंय जायना. देशांत प्यूनाच्या नोकरे खातीर शिक्षणीक पात्रता लागता, मात अशिक्षित, उणे शिक्षित आमदार, खासदार, मंत्री जावंक शकतात. तांका आजल्म पेन्शन दिवपाची तरतूद आसा.
आयज पदवीधर प्यूनाचे काम करतात तेन्ना जेमतेम शिक्षण घेतिल्ले लोकप्रतिनिधी देशाचे प्रशासन चलयतना दिसतात. विधानसभेंतल्या उणे शिक्षित प्यूनाक थंय बडटी मेळपाची शक्यताय नासता. पूण राजकारणांत रिगून तो केंद्रीय मंत्री जाता आनी उच्च शिक्षित आय.ए.एस अधिकाऱ्यांक ताका ‘यस्सर’ म्हणचे पडटा ही विडंबना.
झारखंडात जमशेदपूर – पुरूलिया रस्त्या कुशीक चांडिल गांवा लागसार शेतांत दोन कुडींचें संस्कृत कॉलेज हांवें पळयिल्लें. थंय संस्कृतांत बीएची पदवी ‘मॅनेज’ जाताली. वेतनांत वाडाय मेळोवपा खातीर, नोकरेंत बडटी मेळोवपा खातीर सरकारी नोकर अशा बऱ्याचशा बाजारू शिक्षणीक संस्थांतल्यान पदवी विकत घेतात. ज्या राज्यांतल्या नालंदा विश्वविद्यालयांत शिक्षण घेवपाक सातवे शतकांत चीनी विद्वान ह्यूएन त्सांग (शुवानझांग) आनी आशियांतले विद्वान पावताले त्याच नांलदातलो राजकारणी गुंड राकेश रंजन उर्फ रॉकी हो सद्याच्या नीट पेपर लिक प्रकरणाचो सुत्रधार असो आरोप आसा. राज्यांत शिक्षणाची पातळी सामकी रसातळाक गेल्ले कारणान आनी देशांत त्या पदव्यांक म्हत्व नाशिल्ल्यान बिहारचे विद्यार्थी शिक्षणा खातीर दिल्लीक वचपाक लागल्यात. त्याच कारणा खातीर झारखंडाचे चडशे नागपूराक, ओरिसाचे बेंगळूर आनी हैदराबादेक आनी राजस्थानांतले, हरयाणांतले दिल्लीक
वतात. बनावट पदवीधारक देश खऱ्या
अर्थान विश्वगुरू करपा शकचे नात. प्रामाणिकपणान शिक्षण घेतिल्ल्या होतकरू तरणाट्यांची प्रशासनांत गरज आसा. उच्च शिक्षण संस्थांच्या संख्ये परस थंयच्या शिक्षणाचो दर्जो म्हत्वाचो.

दीपक लाड

पर्वरी