भांगरभूंय | प्रतिनिधी
अाज शणै गोंयबाब हांची जयंती. शणै गोंयबाब हांची समग्र साहित्य संपदा अभ्यासप हीं तरणाट्यांनी तांकां दिल्लीं खरीं आर्गां. गोंयबाबाची साहित्य संपदा खूब व्हड आसा. गोवा कोंकणी अकादेमीन चार खंडांत ती उजवाडायल्या. बाबुमामालो पणस, वासशणैली पोपाय, म्हजी बा खंय गेली आनी हेर बरपां वाचचीं. कोंकणी भाशेचो नीज परमळ तातूंतल्यान हुंगूंक येता. कोंकणी खातीर आपली लागणूक समजून घेवन, कोंकणीचो गोडवो समजून घेवन आपलें योगदान आनी सेवा दिवपाची स्फूर्त ह्या गोंयबाब साहित्यांतल्यान घेवं येता.
गोंयबाबांनी फ्रेंच नाटककार मोलियेर हांचीं नाटकां कोंकणींत रूपांतरीत केलीं. ह्या नाटकांचो आनी संवादांचो अभ्यास केल्यार तांची वीण कितली पक्की आसा हें वाचकाक कळटा. मोगाचें लग्न आनी पोवनांचें तपलें हीं नाटकां माचयेर जायत आसात. पूण तीं काळाक अनुसरून आतां नव्या आटोपशीर आवृत्तींत जावंक जाय. हें काम कलाकार, नाटककार हांणी भुजांर घेवंक जाय.
रवीन्द्रबाबान म्हाका स्कूलाक आसतना गोंयबाबांची पुस्तकां दिलीं आनी तीं म्हजे कडल्यान वाचून घेतलीं. भुरग्यांलो इश्ट आनी भुरग्यांलें व्याकरण म्हाका त्या पिरायेर खूब आवडलीं. शणै गोंयबाबांची जल्मशती दिवचले जाल्ली. तेन्ना रवीन्द्रबाबान म्हाका वांगडा व्हेलो. थंय दिसभर तरेकवार कार्यावळी जाल्यो. म्हज्यांत 11 वर्सांचे ते पिरायेर आंतरीक बदल जालो. त्या काळांत मनीसबळ तशें उणेंच आशिल्लें. पूण भाशेची चऴवळ मुखार व्हरपाक, मागण्यो मान्य करून घेवपाचें तें मुळावण आकांताचें चैतन्यमयी आशिल्लें. त्या चैतन्याची पणटी कायम पेटत उरूंक जाय. ती वात तेवत उरतली जाल्यार तातूंत आमी एकजुटीन कोंकणी खातीर सेवा तेल घालीत रावंक जाय. सुवार्थ, स्वयंपुजा हाका थारो उरूंक फावना.
पुराय संवसाराची जापसालदारकी तुमचेर आसा हे भावनेन काम करात जाल्यारूच तुमी तिगून उरपी कितें तरी करपाक शकतले. हो शक्तीवर्धक मंत्र शणै गोंयबाबन गोंयच्या विद्यार्थ्यांक दिला. तो चलणुकेंत हाडपाक भुरग्यांनी पेंगट बांदचें पडटलें. मुळांत शणै गोंयबाब कितल्या जाणांनी वाचला तें पळोवचें पडटलें. हड्ड्यार घम्म घम्म करून तोणी मारिल्ले वरी हात बडोवन कांय पोके आऩी खोके हांशे करून घेतात. हांवें गोंयबाब वाचूंक ना अशें जयंती आनी पुण्यतीथी दिसा माचयेर उलयतकच थंय हांव हाजीर आसल्यार भिरभिरी मारता. संवसाराची जापसालदारकी आशिल्ले वरी काम करता असो तांचो उपदेश आसा. संवसार मागीर. तांचें साहित्य, विचार जे वाचिनात ते कसलो रथ ओडटले?
आमी बाबत कुळां न्हय अशें शणै गोंयबाब हांणीं सांगिल्लें. प्रेरणा दिवपी मंत्र कसो तो! कोंकणी मनीस खंयचेच नदरेन फाटीं ना आनी ताणें स्वताक कमी लेखचो न्हय, ही स्फूर्त त्या उतरां फाटल्यान आसा. कोंकणी भास आयज डिजिटल आनी ऑनलायन पांवड्यार मात्तूय फाटीं उरूंक ना हाची गवाय तरणाटे दितात. कोंकणी भाशा मंडळ दर वर्सा शणै गोंयबाब कथाकथन सर्त घेता. हे सर्तीक गडगंज यश मेळटा. मेळ्ळां. तातूंतले व्हिडीयो ऑनलायन पळोवंक मेळटात. कोंकणी भाशा मंडळाचो हो तोखेवपा सारको उपक्रम.
कोंकणीच्या मळावेली तरणाटी पिळगी सक्षम आनी तांकीवंत आसा. हुशार आनी बुदवंत आसा. तांकां आयच्या तंत्रगिन्यानाची आनी तें घेवन मुखार कशें वचप हाचें भान आनी जाण आसा. नवे नवे कलात्मक, आनी सृजनात्मक प्रयोग हे प्रतिभावान तरणाटे करीत आसात. यु- ट्युबावेलो पांच मिनटांचो व्हिडीयो कितलो परिणामकारक करूं येता हाका अंत ना. तातूंत फोटे, चित्रां, प्रतिमा आनी पार्श्वसंगीत सुसुत्रपणान आसपावीत करून जो संदेश पावोवपाचो आसा तो प्रभावी तरेन दिवं येता. अशी निर्मिती कितल्याशाच गितांतल्यान, नाटकुल्यांतल्यान आऩी हेर शिक्षणीक विडीयोंतल्यान जाता.
अजून खूब कितें करपा सारकें आसा. शिक्षणीक व्हिडीयो, प्रबोधन करपी व्हिडीयो, मनरिजवण करपी ऑनलायन साहित्य, भाशा आनी साहित्य अशी जायती सामुग्री मोट्या प्रमाणांत जावंक जाय. जगभरांतल्या कोंकणी मनशाक ताचो लाव जातलो.
ऑनलायन माध्यम हें एकविसाव्या शेंकड्यांतलें प्रभावी माध्यम. तांकीवंत. दिशींदिशीं वाडत वचपी. तंत्रगिन्यान मळावेल्या नव्या सोदांच्या आदारान विस्तारत वचपी. ह्या माध्यमांत जाय आशिल्ली म्हायती रोकडीच मेळटा. दृक-श्राव्य-मजकूर ह्या तीन सुत्रां वरवीं ऑनलायन मंचाचेर जादू करूं येता. कोंकणीचे सेवक, तरणाटे आनी रचनाकार ह्या मळार मुखार वचत आसा म्हूण तांची अपुरबाय करीन दिसता.
कोंकणींत पीएचडी जातात. पूण अजून तरी शणै गोंयबाब आनी तांची समग्र साहित्य संपदा ह्या विशयाचेर डॉक्टरेट करपाचे इत्सेन कोणूच विद्यार्थी मुखार कित्याक वचना हो संशोधनाचो विशय!
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
