इलॅक्शनांतल्यो मजेशीर घडणुको

भांगरभूंय | प्रतिनिधी

एकटी जाण्टी बायल आयली. तिका हांवें डमी बॅलट दाखयलो तरी भितर वचून म्हाका विचारता, खंयचोय बटण दामपाचो? हांव – ना ना, तुका कोणाक जाय ताचे नांवां फुडलो.

गोंयांतलें इलॅक्शन जालें! पूण एक इलॅक्शन करतासर फाटल्यान सरकारी कर्मचाऱ्यांचे कितले हाल जातात ते आमकांच खबर आसता. सरकारी कर्मचारी बेकार, कांय काम करनात ही गजाल थोडी खरी जरी आसली (कांय ऑफिसांनी) जाल्यार कांय क्षेत्रांत अशें ना. सरकारी कर्मचारी चड कामां करतात! कार्यालयीन वेळा परस चड काम करतात आनी आपलीं कामां सोडून दुसरींय कामां करतात, म्हणल्यारूच तांच्या माथ्यार मारतात. हांव आनी म्हजे कांय वांगडी प्रिझायडींग ऑफिसराचे ड्यूटीर आशिल्ले. तेन्ना खूब मजेशीर घडणुको जाल्यो. ताचे खातीर इलॅक्शन ड्यूटी सारके बेजार येता त्या ड्यूटीक लेगीत मजा आयली. हरशीं तें काम कटकटीचें. एकवेळ ऑरगॅनिक कॅमिस्ट्री आनी दिल्ली मॅट्रोच्यो लायनी समजून घेवप सोंपें, पूण इलॅक्शन ड्यूटी न्हय. पूण पयलेच खेपे प्रिझायडींग ड्यूटी करतना पयलो हळडीकुकूम केल्ले भशेन दिसता. आतां पळोवया कांय मजेशीर घडणुको.
मशीनां, फायली, बॅगां घेवन आमी सगळे आमकां दिल्ल्या बालरथांत बसले. बालरथ आशिल्ले कारणान खूब जाण भितर सारके जायच नात जाले. धोंपरां मुखार लागपाक लागलीं. खूब वेळ जालो तरी बसीचे ड्रायव्हराचो पत्तोच ना. एकट्यान बरो उमेदीन मोबायल भायर काडलो आनी मुखार नंबर वाचून डायल करपाक लागलो. दुसरो ताका सांगता, आरे तो ड्रायव्हराचो न्हय, ही स्कूल बस, हेडमास्तराचो नंबर तो, सारकें पळय. तो मागीर भायर पळोवन सांगता, नंबर थंय मारल्यात, तो करता रे हांव!! पावतगेर वेवस्था बरी आशिल्ली तें पळोवन बरें दिसलें. म्हजे बी.एल.ओ.न सोमतो व्हॉट्सएपार म्हाका पी.डी.एफ. मेन्यू धाडलो तेन्ना बरें दिसलें. जावं, खंयूय गांवांत खाची भितर ना फकत वडा-पाव बी मेळपाक. तसो हांव आनी म्हजे बरोबर आशिल्ले ते कमी खावपी. (जेवण आं!)
रातचो एकटो पोलिंग एजंट आयलो. ताणे स्पेलिंग बरयली ती पळोवन पयलीं हांव ताका पळयत उरलों – Congras !! आनी कोण रावला रे विचारल्यार तो उलट म्हाका विचारता, खबर ना म्हाका, म्हाका एका फ्रँडान धाडला. हांव ताका – तुजे पार्टीचो कोण रावला तुकाच खबर ना? स्पेलिंगूय येना मरे तुका धड! जाली रात सुरू. पयले दिसा रातचो तर एका बुथार भयानक जोक जालो! एकटो पुलीस खंय प्रिझायडींग ऑफिसराक विचारता, सर आज रातचो आपूण तुमचे वांगडा न्हिदों!!! दुसरे दिसा सकाळीं मॉक पोल जावन एड्रेस टॅग कशें आनी खंय लावप तें विचारपाक एकट्यान सरळ कलॅक्टराक फोन केलो! सगळे अजाप! इतलें ट्रेनिंग आनी व्हिडियो धाडून कसलो उपेग मागीर?
सकाळीं पावणे सातांक सुमार लोकांनी लायन लावपाक सुरवात केली. इलॅक्शनाक लोक एक तर सक्काळचे वतात वा सांजेर येतात. वताक चड येनात. कांय हुशार लोक दनपारचे येतात, वत आसता न्हय म्हणून चड कोण येवपा ना, लायनींत रावचें पडचें ना म्हणून. लायनींत राविल्ले कडेन हळडीकुकमाक करतात तसल्यो खबरी आसतात. कोण एकटो कोणाचे बायलेक सांगपा लागलो – “प्रकाशाल्या चेड्यालें लगीण जालें यमुनाल्या चेडवा वांगडा. जावं बरें जालें. कितलीं वर्सां चलतालें तेंगेलें. जावं जाय आसलें बेगीन तेंगेलें. जालें न्हू आतां, बरें दिसलें आमकांय बी. बेश्टीं धांवन गेल्लीं बी जाल्यार लज वयता आसली.” (next next म्हणल्यार सुद्दां हांचो पत्तोच ना, फुडें दुसऱ्यालीय सोयरीक जुळोवपाक लागलीं !) खूब लोक तर व्होट करतगेर स्लीप प्रिझायडींग ऑफिसराक दिवपाक येताले वा विचारपाक येताले – जालें न्ही, मागीर हांव – हय हय जालें!
एकटी जाण्टी बायल आयली. तिका हांवें डमी बॅलट दाखयलो तरी भितर वचून म्हाका विचारता, खंयचोय बटण दामपाचो? हांव – ना ना, तुका कोणाक जाय ताचे नांवां फुडलो. दिसच ना मरे पुता, यो हांगा, म्हागेलो हाकाच रे (चिन्नाचें नांव घेतलें). हांव – आगे ओगी बस, सांगप ना अशें, नांव घेनाका. ती – आं नांव सांगू, अमक्याकूच (तिणे मोठ्यान नांव घेतलें!) मत म्हाजें. आगे सांगप नासता, नांव घेनाका!! तूं सारकें पळय आनी बटण दाम, हांव फुडें रावतां, भितर येवपाक मेळना.
खूबदां तर दोन-तीन बायलो बटण सारको दाम नासतनाच गेलीं. तांकां परत आपोवन सारको जोरान दाम म्हणून सांगचें पडलें. थोडीं नांवां आयकून गांवची याद आयली तर थोडीं नांवां आयकून फिल्मांची. रवळू, लाडू, अनारकली बी नांवां.
व्होटींग बरें नेटान चालू आशिल्लें. एकटी जाण्टेली बायल व्हीलचेराचेर बसून आयली. तिका एक वेळ कळचें ना म्हणून हांव पयलींच डमी बॅलट घेवन तिचे कडेन गेलों. ती मागीर म्हाका, खबर आसा रे पूता, तुजे परस खूब इलॅक्शना केल्यांत हांवें आनी आमी हांसलीं. मागीर ती मतदान करपाक गेली आनी सांगता – आपल्याक पेपर आनी शिक्को दिवूंच ना मरे. कशें मत मारपाचें. हांव – आगे म्हणून तुका हांव सांगपाक आयिल्लों कशें करप तें. राव परत सारकें सांगतां. तीन-चार लोक तर पिवन आयिल्ले. हाचे वेल्यान एक कळटा, बार्रां बंद करून कांय फायदो ना, सगळे स्टॉक करपाक हुशार! ताणीं मास्क लावन आयल्यार बरें, ना जाल्यार सोऱ्या वासान आमी हांगा बेशुद्ध जावपाचे.
खूब लोक मोबायल घेवन येताले. हांव सगळ्यांक मोबायल बी ना मरे? भायर दवर म्हणून सांगतालों. एकटो चलो आयलो, हांव ताका – मोबायल बी ना मरे? तो – आसा, राव आं. आनी तो भायर दवरिल्लो मोबायल भितर घेवन आयलो, हो घे. हांव – आरे भायरूच दवर रे, हाडपाक लावूं ना तुका! आनी एकटी जाण्टी बायल भितर गेली आनी सांगता, पर्रीकारालें नांवूच ना मरे, हांव फकत पर्रीकाराक मत मारतलें. मागीर तिका सांगचें पडलें पर्रीकार आतां ना, तो कसो रावतलो उबो? असल्यो कांय मजेशीर घडणुको पळोवन कर्मचाऱ्यांचे माथ्यावेलो पेज कमी जावन तोंडार मातसो हांसो फुलता. पूण तोंड धुवपाची ओसीडी आशिल्ले मनशांक तोंड धुवपाक मेळना म्हणून खूब त्रासूय मात जातात.

आदित्य सिनाय भांगी
9673585953