हॉटेलां परस पर्यटकांक आवडटात व्हिला

भांगरभूंय | प्रतिनिधी

सरकारान गोंयच्या व्यवसायिकांक उर्बा दिवपाची गरज आसा आनी ‘होम स्टे’ सारकें धोरण मुखार व्हरपाची गरज आसा. हातूंतल्यान थळावे आनी गांवगिऱ्या वाठारांतले लोक आत्मनिर्भर जावंक शकतले.

गोंयांत दर वर्सा सुमार आठ लाख पर्यटक येवन वतात. म्हुणल्यार गोंयच्या लोकसंख्ये परस कितलेशेच पटीन पर्यटक गोंय पळोवपाक येतात. तांची रावपाची खावपाची सुविधाय हांगां निर्माण करून दिवच्यो पडटात. हे खातीर हजारांनी हॉटेलां तयार जालीं. गोंय सरकारान हालीं हालीं तर ‘होम स्टे’ धोरणूय चालीक लायलां. मात ह्या धोरणाक आतां मेरेन कितलो प्रतिसाद मेळ्ळा आनी मुखार कितलो मेळटलो हें सरकारी अधिकारीच सांगूक शकतले. तसो वावर केलो जाल्यार ही संकल्पना बरे तरेन चालीक लागूंक शकता. ते खातीर सरकारा मदीं आनी अधिकाऱ्यांकूय इत्साशक्ती आसप गरजेची. हातूंतल्यान थळाव्या लोकांक येणावळ मेळपाक शकता इतलें खरें…
गोंयांत येवपी पर्यटकांचो आंकडो तसो खूब आसा. हालींच्या तेंपार तर ‘ग्रुप’ करून भोंवपाक येवपाचेंय प्रमाण वाडलां आनी हे खातीर अशे पर्यटक ‘व्हिलां’नी रावपाक पसंद करतात. ते खातीर गोंयांतय आतां ‘व्हिलां’ची संस्कृती आयल्या. मात ह्या ‘व्हिलां’ खातीर आतां ल्हान आनी मध्यम हॉटेलकारांक लुकसाण जावंक लागलां असो हुस्को ते उक्तायतात. ते खातीर तांणीय आतां ह्या नव्या व्यवसायांत भितर सरपाचें थारायलां.
हालीं हॉटेलां वांगडाच दर्यादेग वांठारांत व्हिलांचोय आंकडो वाडला आनी राज्यांत येवपी पर्यटकांक आकर्शीत करपाक लागल्यात. ‘एरबीएनबी’, बुकिंग्स डॉट कॉम आनी हेर बुकींग पोर्टलां वांगडाच ‘व्हिला’ संस्कृतायेचो प्रसार करपाक सोशल मिडियाचीय मुखेल भुमिका आसा.
सोशल मिडिया इन्फ्लुयंसर जेन्ना खंयच्याय राज्याचे भेटेर वतात तेन्ना ते थंयचे व्हीडीओ काडून आपल्या अकावंटाचेर घालतात. हे खातीर त्या त्या सुवातांचो प्रसार जाता. गोंयांत अशे सुमार सशें व्हिला आसात जे वॅबसायटींचेर नोंद आसात. हांचे 24 वरां खातीरचे दर 3500 रुपया ते 9500 रुपया लेगीत आसा. पूण, हातूंत तीन ते चार रूम, रांदपाची सुविधा आनी स्विमिंग पुलूय मेळटा. जें साध्या हॉटेलांनी मेळनात. हॉटेलांनी एका रुमाक जर 1500 रुपया फारीक करचे पडटात, जाल्यार व्हिलांत इतल्यो सुविधा मेळिल्ल्यान ‘ग्रुपा’न येवपी पर्यटक व्हिलांतच रावपाक पसंद करतात. ते खातीर हॉटेलांचो वेवसाय उणो जावंक लागला असो हुस्को ह्या मळार उक्तायतात.
गोंयांतल्या दरेक दर्यादेग वाठारांत आतां व्हिला दिसतात. मात, तांचे धनी हे गोंयकार नासून ते चडशे बिगर गोंयकार आसात. ते घेतनाच 10 ते 15 व्हिला विकत वा भाड्यान घेतात आनी आपूण पर्यटकांक भाड्याक दितात. हे वरवीं तांचो बरो वेवसाय जाता. तशेंच थोडेच कामगार दवरून तांकां ह्या वेवसायाचें बरे तरेन वेवस्थापन करपाक मेळटा.
भाड्यान दिवपी हे व्हिला हालीं हालीं संबंदीत खात्या वांगडा नोंद जावंक लागल्यात. तांकां ‘डी’ श्रेणींत नोंद करतात. सरकाराचे अधिकृत आंकडेवारी प्रमाण 2023 मेरेन चार वर्गांत 6269 हॉटेलां नोंद जाल्यांत, तातूंत सी आनी डी वर्गांत अनुक्रमान 2597 आनी 3283 हॉटेलां आसात. मात हातूंत व्हिला कितले आसात तें कळपाक कुस्तार.
हाॅटेल धनयांच्या म्हणण्या प्रमाण, व्हिलाचो व्यवसाय करतना तांकां कसलेच व्यवसायीक कर फारीक करचे पडनात. तांकां लायट लेगीत ‘डॉमेस्टीक’ दरान मेळटा आनी कोयराचेर लेगीत कर लागना. तशेंच स्विमिंग पूल बांदतना वेगवेगळ्या खात्यांचीय परवानगी घेवची पडना. हॉटेल धनयांक मात सगळ्यो तरेच्यो परवानगी आनी कर लागतात. हे खातीर हॉटेलधनी लेगीत आतां व्हिलाच्या व्यवसायांत येवंक सोदतात. गोंयच्या पर्यटन मळार कितलेशेच बिगर गोंयकार घुसल्यात आनी ताचो परिणाम गोंयकारांचेर जावंक लागल्यात. बरीं बरीं रेस्टोरंटां लेगीत विदेशी लोक येवन चलयतात. हे खातीर गोंयकार व्यवसायीक आपल्याच राज्यांत परकी जाल्लेवरी जाला. हे खातीर सरकारान गोंयच्या व्यवसायिकांक उर्बा दिवपाची गरज आसा आनी ‘होम स्टे’ सारकें धोरण मुखार व्हरपाची गरज आसा. हातूंतल्यान थळावे आनी गांवगिऱ्या वाठारांतले लोक आत्मनिर्भर जावंक शकतले.

समीर नायक
मडगांव