भांगरभूंय | प्रतिनिधी
कांय दिसां आदीं गोंयच्या घुंवळे वखदां विरोधी पंगडान एका ‘सिविल इजिनीयरा’क घुंवळे वखदां वेव्हारांत धरला. हो तरणाटो मूळ गोंयकार आनी आपल्याच घरांत तो गांजा रोयतालो अशें मुळाव्या तपासांत दिसून आयलां. हो अभियंतो आसून लेगीत, ताका ह्या घुंवळे वखदांच्या वेवसायांत कित्याक येवचो पडलो हो चिंतपा सारको विशय. एक तर ताका नोकरी मेळूंक ना, घरांतली परिस्थिती बरी ना वा सोंपे तरेन पयशे करपाची आस. कितेंय आसूं येता…
पूण हे घडणुके वयल्यान एक सिद्ध जाता तें म्हणल्यार गोंयांत घुंवळे वखदां तयार जावंक लागल्यांत. तीं घरांत प्रयोगशाळा तयार करून किल्लून काडपाक लागल्यात वा रसायनां घालून तयार करपाक लागल्यात. हो एक भिरांकूळ प्रकार हालींसरा गोंयांत दिसपाक लागला. पोरसांत रोयल्यार तो लोकांक दिसतलो आनी ताचो वास पुलिसां मेरेन पावतलो ह्या भंयान ह्या वेव्हारांत आशिल्ले दुबावीत गांजा कृत्रिम तरेन वाडयतात. हो प्रकार गोंयांत सर्रास दिसपाक लागला.
हालींच मार्च म्हयन्यांत एका 33 वर्सां पिरायेच्या रशियन नागरिकाक, तो गोंयांत जंय भाड्यान रावता त्या घरांत ‘सायलोसायबीन’ अळमी तयार करतना धरलो. ताचे कडल्यान 1.70 कोटी रुपयांची घुंवळे वखदां जप्त केलीं. हाचो अर्थ विदेशांतल्यान आयिल्ल्या व्यक्तीकय गोंयांत अशे बेकायदेशीर वेव्हार करपाक कसलोच भंय दिसना. कित्याक? हो चर्चेचो विशय जावं येता. सध्या आमच्या गोंय पुलिसांचेर ‘लांच’ घेतात म्हूण आरोप जातात. हालींच तर तिगा पुलिसांक दर्यावेळेचेर ‘पॅराग्लायडींग’चो वेवसाय चलोवप्या कडल्यान लांच घेतली म्हूण अटकूय जाली. ‘पॅराग्लायडींग’चो वेवसाय कायदेशीर आसूनय पुलीस ताका कथीतपणान लुट्टाले. मागीर बेकायदेशीर वेवसाय करतल्यांक ते बेश्टे सोडटले? घुंवळे वखदांचो वेव्हार सुरळीतपणान अशेच तरेन जाता काय?
गोंयांत गांजा सोंपेपणान खंयूय मेळटा. तो गांवागांवांत पावला. त्या भायर हशिल ऑयल, कोकेन, एलएसडी, एक्सटसी टॅबलेट, एमडीएमए, हॅरोईन आनी हेर घुंवळे वखदांचे प्रकार मेळपाक लागल्यात. 2018 सावन नदर मारली जाल्यार, विदेशी पर्यटक हांगां रावून कशे तरेन घुंवळे वखदां किल्लून काडटात आनी ताचो बाजार करतात हें दिसून येतलें. 2018 वर्सा हणजुण्यां एका रशियन जोडप्याक भाड्याच्या रुमांत गांजां रोयतना धरिल्लीं. ते उपरांत 2019 वर्सा चार रशियन नागरिकांक भाड्याच्या रुमांत गांजा रोयतना धरिल्ले. ते उपरांत 2020 वर्सा आनीक एका रशियेच्या नागरिकाक मोरजे गांजा किल्लून काडटना धरिल्लो. हाचो अर्थ ते बिंधास्तपणान आनी पुलिसांचो भंय धरिनासतना हीं बेकायदेशीर कामां करतात. घुंवळे वखदांच्या वेवसायांत आदीं विदेशी नागरिकूच चड सांपडटाले. पूण आतां आमचे गोंयकार तरणाटेय चड प्रमाणांत सांपडूंक लागल्यात.
विरोधी पक्षांचे फुडारी गोंयांत बेकारी वाडटा म्हूण बोवाळ घालतात. तातूंत घडये तथ्य आसूं येता आनी हेच खातीर घडये हे बेकार तरणाटे सोंपेपणान पयशे मेळपी ह्या वेवसायांत भितर सरतात. गोंयांत राहणीमानाचो दर्जोय उंच आसा आनी म्हारगायूय आसा. हे खातीर बॉल्सांतले पयशे केन्ना सोंपतात तें कळना. अशा वेळार तरणाट्यांक चड पयशांची आस जाता आनी घुंवळे वखदांच्या वेवसायांत घुस्पतात. एकदां तातूंत घुस्पतकच ते भायर सरूंक शकतात? कायद्याचो भंय तयार जालो जाल्यार भायर सरूंक शकतय. पूण अशे कितलेशेच जाण भितर पडटात आनी ते सुटून येतकच परत तोच बेकायदेशीर वेव्हार करतात. पयलेच फावट भितर पडटकच घडये तांचे मदीं भंय निर्माण जाता आसतलो, मागीर वळखी जातात आनी तें सदचेंच जाता. तातूंत जर तांचे कडल्यान ‘लांच’ घेवपाचो प्रकार सुरू जालो, जाल्यार मागीर तांकां कोणाचो भंय? हे खातीर लांच घेवपी, मागीर ती कसल्याय कामां खातीर आसूं, अधिकाऱ्यांचेर कारवाय जावंकूच जाय. नाजाल्यार दुबावितांक जल मेळटा आनी ते तोच गुन्यांव परत परत करतात.
गोंय घुंवळे वखदांक लागून बदनाम जालां. सोशल मिडियाचेर लेगीत पर्यटक हे विशीं उलयतात. ताचो परिणाम ल्हवू ल्हवू करून आमच्या पर्यटनाचेर जाता. हे खातीर ही पिडा सदां खातीर हुमटावन भायर उडोवपाची गरज आसा. पूण अशें करपाक सरकारांक इत्साशक्ती आसप गरजेची. तशेंच अशा गजालींचेर सदळ रावपी अधिकाऱ्यांचेर कारवाय करपाची गरज आसता. हें केलेंना जाल्यार आमच्या गोंयचें नांव पिड्ड्यार जायत रवातलें. सरकारान घुंवळे वखदांचीं पाळां- मुळां हुमटावन उडोवपाची गरज आसा.
घुंवळे वखदांचो प्रसार जावचो न्हय म्हूण वरिश्ट पुलीस अधिकारी विद्यालयां, महाविद्यालयांनी वचून जागृताय करतात. ताचो बरो परिणामूय जाता आसतलो. पूण जेन्ना खंयच्याय दुबाविताक घुंवळे वखदां विकतना धरतात, तेन्ना तो जामिनाचेर सुटलो म्हणटकच ताचेर पाळत दवरप गरजेची. हाचेर प्रामाणिकपणान सेवा दिवपी पुलिसांनी भर दिवंक जाय. नाजाल्यार आमचे शिकिल्ले तरणाटे अशेच तरेन घुंवळे वखदांचे भकीक पडटले. तें आडावप गरजेचें…
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
