भांगरभूंय | प्रतिनिधी
म्हापशें, प्रतिनिधी ः गोंयांत पर्यटना खातीर येवपी विदेशी म्हळ्यार आंतरराष्ट्रीय पर्यटकांचो आंकडो ५ परस चड पटीन देंवल्या. २०१९चे तुळेंत २०२२ वर्सा आंतरराष्ट्रीय पर्यटकांनी गोंयांक पसंती दिल्या. २०१९त गोंयांत १.७१ लाख विदेशी पर्यटकांनी भेट दिल्ली. जाल्यार कोरोना म्हामारी उपरांत २०२२ त फकत ३३ हजार ५१४ विदेशी पर्यटकांनी गोंयांक पसंती दिल्या.
कोविडा पयलीं आनी उपरांत राज्याक कितल्या पर्यटकांनी भेट दिली असो प्रस्न आमदार आलेक्स रेजिनाल्ड लॉरेन्स हांणी विचारिल्लो. ताचेर पर्यटन मंत्री रोहन खंवटे हांणी विधानसभा अधिवेशनांत दिल्ले लेखी जापेंतल्यान करोना उपरांत राज्यांतलो पर्यटन वेवसाय देंविल्ल्याचे कळटा.
डिसेंबर २०१९ त १७१३०२ आंतरराष्ट्रीय पर्यटक गोंयांत पर्यटना खातीर आशिल्ले. उपरांत २०२० वर्सा ५३७७ आनी २०२१ त १५९५ आंतरराष्ट्रीय पर्यटक गोंयांत आयिल्ले. जाल्यार २०२२ त ३३५१४ आंतरराष्ट्रीय पर्यटकांनी राज्यांत भेट दिल्ली. तशेंच २०२३ वर्साचो आंतरराष्ट्रीय पर्यटकांचो डाटा आजूनय संबंदीत सुत्रां कडल्यान मेळ्ळा, अशें लेखी जापेंतल्यान पर्यटन मंत्र्यांनी नमूद केलां.
२०२० आनी २०२१ हो दोन वर्सांचो काळ करोना महामारीचो आशिल्लो. ह्या काळांत पर्यटनाचेर खुबशे निर्बंध आशिल्ले.ताका लागून गोंयांत आंतरराष्ट्रीय पर्यटक पर्यटना खातीर येवंक नाशिल्ले. मात ताचे उपरांत २०२२ त आतंरराष्ट्रीय पर्यटकांचो आंकडो ५ पटी परस चड पटीन देंवला. कोविडा पयलीं गोंयाक भेट दिवपी विदेशी पर्यटकांचो आंकडो लाखांच्या घरांत आशिल्लो. मात करोना उपरांत हो आंकडो आदल्या पदार येवंक ना.
ताका लागून मंत्री मावीन गुदिन्हो आनी आमदार मायकल लोबो हांणी दर्जेदार म्हळ्यार आंतरराष्ट्रीय पर्यटकांच्या देंविल्ल्या आंकड्याचेर चिंता उक्तायली. राज्यांतलो विमान प्रवास, टॅक्सी, हॉटेल आनी खावपा पिवपाचें दर वाडिल्ल्यान दर्जेदार पर्यटकांचो आंकडो उणो जाल्ल्याचो दावो तांणी उक्तेपणान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
