भांगरभूंय | प्रतिनिधी
पणजीः 11वेच्या वर्गा खातीर प्रवेश प्रक्रियेंत फकत कोटा भरपा खातीर विद्यार्थ्यांक ‘भरती’ करपाचेर लक्ष केंद्रीत करचें न्हय. शिक्षकांनी तांकां तांच्या आवडी प्रमाण योग्य शिक्षणीक दिका दाखोवपा खातीर मार्गदर्शकांची भुमिका करची असो उलो मुख्यमंत्री डॉ. प्रमोद सावंत हांणी मारलो. गोंय शालांत मंडळान (एसएससी) धावेचे निकाल जाहीर केल्या उपरांत, 11वेच्या प्रवेश प्रक्रियेचे फाटभुंयेर तांणी हें विधान केलें.
अंदूं 10वेच्या निकालांत 94.51 टक्क्यांनी पास जाल्ल्या सगळ्या विद्यार्थ्यांक मुख्यमंत्र्यान परबीं भेटयलीं. गांवगिर्या वाठारांतल्या सांगें, केपें, धारबांदोडें, काणकोण, पेडणें ह्या तालुक्यांतल्या विद्यार्थ्यांनी शारांतल्या विद्यार्थ्यां परस बरी कामगिरी केल्ल्यान तांणी समाधान उक्तायलें. चलयांक मेळिल्ल्या प्रभावी येसाचीय तांणी ह्या वेळार तोखणाय केली.
करियर वेंचतना विचार करात
11वेच्या वर्गाची प्रवेश प्रक्रिया आयज सावन सुरू जाल्या. हे विशीं विद्यार्थ्यांनी कला, विज्ञान, वाणिज्य सारक्या पारंपारीक फांट्यां वांगडाच वेवसायीक अभ्यासक्रम, आयटीआय वा डिप्लोमा सारकिल्ल्या पर्यायांचो गंभीरतायेन विचार करचो अशें मुख्यमंत्र्यान सांगलें. पालकांनी आनी शिक्षकांनी विद्यार्थ्यांच्या फुडाराचो विचार करून तांचे कडेन चर्चा करची.
शिक्षकां खातीर म्हत्वाचो सल्लो
फकत आंकडो वाडोवपा खातीर विद्यार्थ्यांक प्रवेश दिवचो न्हय असो सल्लो मुख्यमंत्र्यान माध्यमीक आनी उच्च माध्यमीक शाळेंतल्या शिक्षकांक दिलो. ताचे बदला 10वेच्या वर्गांतल्या शिक्षकांनी आपल्या विद्यार्थ्यांक आवडटा तो विशय वळखून तांकां योग्य मार्गदर्शन करचें. शिक्षकांच्या यत्नांक लागून आनी गोवा बोर्डाच्या तत्परतायेक लागून अंदूंचे निकाल प्रगतीशील लागल्यात, आनी फुडाराकय ही परंपरा चालूच उरची अशी आस्त मुख्यमंत्र्यान ह्या वेळार उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
