भांगरभूंय | प्रतिनिधी
पणजी : दिवचलचो नवोदित बॉडी बिल्डर समर्थ नायक हाणें मुंबय जाल्ले ‘आयसीएन मुंबय मॅजेस्टीक’ राष्ट्रीय सर्तींत येस मेळयलां. ताणें ‘मॅन्स फिटनेस मॉडेल’ विभागांत एक भांगरा पदक आनी एक कांस्य पदक मेळोवन गोंयचें नांव पर्जळयलां. समर्थ हो शिवसेना दिवचलेचे मुखेली अनिल नायक हांचो पूत.
समर्थान वास्कोचे फिटनेस प्रशिक्षक साहिल शर्मा हांचे कडल्यान मोलादीक मार्गदर्शन घेतिल्लें. शर्मा हांच्या मार्गदर्शना खाला समर्थान हे सर्तीची तयारी केल्ली. अणभव आशिल्ल्या प्रशिक्षकाच्या नियोजनाक लागूनच सामर्थाक हें येस मेळ्ळें. समर्थाच्या येसाची दखल घेवन शिवसेना गोंय राज्य फांट्यान तांची तोखणाय केल्या. शिवसेनाचो प्रदेश मुखेल उपेंद्र गांवकार आनी राज्य सचीव काशीनाथ मयेंकार हांणी समर्थाक परबीं दिवन ताच्या फुडारा खातीर परबीं भेटयलीं.
समर्थान मेळयल्लें हें येस फकत नायक कुटुंबा खातीर न्हय तर पुराय गोंय खातीर अभिमानाची गजाल अशी भावना ह्या वेळार तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
