भांगरभूंय | प्रतिनिधी
पणजी, प्रतिनिधी : गोंय विद्यापीठांत एलडीसी पोस्टांच्या नोकर भरतेंत गैरप्रकार जाल्ल्याचें प्रकरण हणदोणचे आमदार कार्लूस फेरेरा हांणी सभाघरांत काडलें. २२ ऑक्टोबर २०२२ दिसा गोंय विद्यापिठाचे वेबसायटीर कंत्राटाचेर एलडीसी पोस्ट घेवपा खातीर एक जायरात आयिल्ली. उपरांत दुसरे दीस दिसाळ्यांनी तीच जायरात प्रसिद्ध जाली. तेन्ना थंय कंत्राट शब्दूच नाशिल्लो. पुराय गोंयभरच्या २५०० तरण्याट्यांनी ताका अर्ज केले. पदांची लेखी परिक्षा विद्यापिठान ५ मार्चाक घेतिल्ली. निकाल जाहीर करचे पयलींच पांच जाणांक ‘कायम कर्मचारी’ म्हणून कामार घेतल्यात, अशें आमदार कार्लूस हांणी सभाघरांत सांगलें.
भांगरभूंय दिसाळ्यान हाचे पयलीं हो विशय उक्ताडार हाडिल्लो. निकाल जाहीर करचे पयलींच पांच जाणांक कामार घेतल्यात अशें कार्लूस हांणी सांगलें. कामार घेतिल्ल्यां मदलो एकलो ५ मे सावन कामार रुजू जाला. तशेंच तीग जाण ११ मेक जाल्यार एकलो १७ मेक रुजू जाला. म्हळ्यार चार जाण निकाल वॅबसायटीर जाहीर करचे पयलीं आनी एकलो नोकरेची जायरात जाहीर जाल्ल्या, ताच्या दुसर्या दिसा सावन. मुख्यमंत्र्यान विधानसभेंत एका अतारांकीत प्रस्नाक लेखी जाप दिल्ली. तातूंतल्यान ही म्हायती उक्ताडार आयिल्ल्याचें कार्लूस हांणी सांगलें.
आयज आमदार फेरेरा हांणी हो विशय सभाघरांत हाजीर आशिल्ल्यांचे नदरेक हाडून दिलो. सरकारान हाची चवकशी करून सगल्यांक सारको न्याय दिवचो अशेंय तांणी मागलां.
गोंय विद्यापीठ स्वायत्त संस्था, मात अशें कितेंय जाल्लें आसल्यार हाची शिक्षण सचिवाक चवकशी करपाक लायतां अशी जाप मुख्यमंत्री प्रमोद सावंत हांणी जाप दिली. ह्या प्रकरणाची केन्ना चवकशी जाता आनी सगल्यांक न्याय मेळटा हाची उमळशीक आतां लोकांक लागल्या. हातूंत संबंदीत व्यक्तींक कडक ख्यास्तूय जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
