भांगरभूंय | प्रतिनिधी
म्हापशें: दत्तवाडी हांगा हीट अॅण्ड रन अपघात प्रकरणांत दुचाकीक धपको दिवन पळ काडिल्लो मोटार चालक दुबावीत मंतेश श्रीकांत बासांगल (ओर्डा कांदोळी) हाचे आड म्हापशें पुलिसांनी गुन्यांव नोंद केला.
ह्या अपघातांत मार्ना शिवोलीचे हेनरी मायकल फर्नांडीस (70) आनी फिलोमिना फर्नांडीस (72) हीं जाण्टीं दुचाकीचेर आशिल्लीं जखमी जालीं. हो अपघात फाटल्या 31 जानेवारी दिसा दनपारां 12 वरांच्या सुमाराक दत्तवाडी हांगा टाटा कन्सलटन्सी सर्व्हीस आस्थापना मुखार घडिल्लो.
जखमी जाण्टे नागरीक आपल्या जीए 03 एसी 8909 क्रमांकाचे दुचाकी वेल्यान म्हापशें सावन गणेशपुरी मार्गान मार्ना शिवोले वताले. घडणूक थळार मुखा वेल्यान गतीन येवपी जीए 03 एएफ 4976 क्रमांकाचे मोटारीन ह्या स्कुटरीक धपको दिलो. ह्या अपघातांत वयले दुचाकीर बशिल्लें जोडपें जखमी जालें.
दुबावीत मोटार चालकान जखमींक वैजकी मजत तशेंच पुलिसांक अपघाताची म्हायती दिनासतनाच घडणूक थळा वेल्यान पळ काडलो.
ह्या प्रकरणांत पुलिसांनी दुबावीत मोटार चालका आड भादंसंच्या 279, 337, 338 आनी मोटार वाहन कायदो कलम 234(अ)(ब) खाला निश्काळजीपणान वाहन चलोवन अपघात करप, तशेंच घडणूक थळा वेल्यान पळ काडिल्ल्यान गुन्यांव नोंद केलो. फुडलो तपास पुलीस हवालदार उल्हास गांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
